كاسپي جاعالاۋىندا يتبالىققا تاس لاقتىرىپ، قورلاعاندار جازاسىن الادى

اقتاۋ. قازاقپارات - ماڭعىستاۋدا يتبالىقتى قورلاعاندار جاۋاپكەرشىلىككە تارتىلادى.

بۇل جايلى ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت ءمالىم ەتتى، دەپ حابارلايدى قازاقپارات.

«6- شىلدە كۇنى كاسپي تەڭىزىنىڭ جاعالاۋىندا دەمالىپ جاتقان ادامداردىڭ تەڭىزدەگى يتبالىقتى قورلاپ، وعان تاس لاقتىرعانى بەلگىلى بولدى. بۇل فاكتى بويىنشا ماڭعىستاۋ وبلىسىنىڭ ورمان شارۋاشىلىعى جانە جانۋارلار الەمى اۋماقتىق ينسپەكتسياسى وبلىستىق پوليتسيا دەپارتامەنتىنە حات جولدادى. وندا جانۋاردى قورلاعان ادامداردى انىقتاپ، جاۋاپكەرشىلىكە تارتۋ جونىندە ايتىلعان» دەپ جازادى Facebook پاراقشاسىندا ساكەن دىلداحمەت.

ونىڭ ايتۋىنشا، قازاقستان زاڭناماسىندا اڭ-قۇستى قورلاعاندار ءۇشىن ايىپپۇل نەمەسە قوعامدىق جۇمىسقا تارتۋ جازاسى قاراستىرىلعان.

«ەرتەڭ 8- شىلدەدە ماڭعىستاۋ وبلىسىنىڭ ورمان شارۋاشىلىعى جانە جانۋارلار الەمى اۋماقتىق ينسپەكتسياسىنىڭ ينسپەكتورلارى تەڭىز جاعالاۋىندا دەمالىپ جاتقان ادامدار اراسىندا ءتۇسىندىرۋ جۇمىسىن جۇرگىزەدى» دەپ اتاپ ءوتتى ساكەن دىلداحمەت.

ەسكە سالا كەتەيىك، 6- شىلدە كۇنى الەۋمەتتىك جەلىدە دەمالىپ جاتقان ادامدار كاسپي يتبالىعىنا تاس لاقتىرعانى تۋرالى ۆيدەو پايدا بولدى. ۆيدەودا كورىنىپ تۇرعانداي، يتبالىق ادامدارعا شابۋىل جاساۋعا نيەتسىز، قىزىق كورىپ جاقىنداعان. وكىنىشكە قاراي، وتانداستارىمىز قاۋىپ تۋدىرمايتىن اڭعا جابايىلىقپەن جاۋاپ بەرىپ، تاس لاقتىرعان.