قازان حالىقارالىق فەستيۆالىندە «كەدەرگىلەردى جەڭۋ» دەرەكتى فيلمى كورسەتىلەدى
كارتينانىڭ رەجيسسەرى - بانۋ رامازانوۆا، دەپ حابارلايدى قازاقپارات «قازاق فيلمنىڭ» باسپا ءسوز قىزمەتىنە سىلتەمە جاساپ.
ق ر مادەنيەت جانە سپورت مينيسترلىگىنىڭ تاپىسىرىسىمەن «قازاق فيلم» كينوستۋدياسىندا تۇسىرىلگەن دەرەكتى فيلمنىڭ جەلىسى 1952-جىلى جامبىل ماڭىنداعى لۋگوۆوي جىلقى زاۋىتىندا تۋعان سوۆەت زامانىنداعى جىلقى سپورتىنىڭ اڭىزى بولعان «ابسەنت» اقالتەكەسى تۋرالى جانە تاۋەلسىز قازاقستانداعى كونكۋردىڭ جاعدايىن باياندايدى.
XVI قازان حالىقارالىق مۇسىلمان كينوسى فەستيۆالى بيىل تەحنيكالىق تارتىپتە وتەتىندىكتەن كورەرمەندەر ءۇشىن جابىق بولادى. مۇنداي شەشىمدى فەستيۆالدىڭ قۇرىلتايشىلارى مەن ۇيىمداستىرۋشىلارى كوروناۆيرۋس ينفەكتسياسى تارالماس ءۇشىن قابىلدادى.
ايتا كەتۋ كەرەك، ۇيىمداستىرۋ كوميتەتى 63 ەلدەن 629 فيلم تىركەدى. كينو تانۋشى سەرگەي اناشكيننىڭ توراعالىعىمەن ىرىكتەۋ كوميسسياسى 52 فيلمنەن تۇراتىن قىسقا تىزىمگە كونكۋرس جاسالدى. قازاقستاندىق فيلم باق سىنايتىن «تولىق مەتراجدى دەرەكتى فيلمدەر» بايقاۋىندا ءۇندىستاننان، تاجىكستاننان، گەرمانيادان، شۆەيتساريادان، رەسەيدەن جانە باسقا ەلدەردەن 10 فيلم ۇسىنىلدى.
جەڭىمپازداردىڭ ءتىزىمى قىركۇيەكتىڭ باسىندا فەستيۆالدىڭ رەسمي سايتىندا جاريالانادى.
ەستەرىڭىزگە سالا كەتسەك، «كەدەرگىلەردى جەڭۋ» دەرەكتى فيلمىنىڭ فەستيۆال تاريحى تۇركيادا باستالدى.
2020-جىلدىڭ مامىر ايىنىڭ سوڭىندا فيلم Anatolia International Film Festival باستى بايقاۋىنا قاتىستى. تامىز ايىندا اتالمىش فيلم تاعى ەكى فەستيۆالدە باق سىنايدى.
1-7- تامىز ارالىعىندا گرەكيادا وتەتىن 7- يەراپتەرا حالىقارالىق دەرەكتى فيلمدەر فەستيۆالىنىڭ نەگىزگى كونكۋرستىق باعدارلاماسىنا جانە 23-30- تامىز ارالىعىندا Docs Without Borders Film Festival كينوفەستيۆالىنىڭ نەگىزىگى كونكۋرسىنا قاتىسادى.