يممۋنيتەتتى كوتەرىپ، كوروناۆيرۋستان قالاي قورعانۋعا بولادى - دارىگەردىڭ كەڭەسى
«قازىرگى احۋالدى، جاعدايدى ەسكەرەتىن بولساق، بارلىعىمىز «ءبىر جاعادان باس، ءبىر جەڭنەن قول» شىعاراتىن ۋاقىتتىڭ ءدال بەل ورتاسىندا تۇرمىز. سوندىقتان دارىگەر- ينفەكسيونيست، بالالار دارىگەرى، ءۇش بالانىڭ اناسى رەتىندە COVID-19 ينفەكسياسىنان قورعانۋ شارالارىمەن بولىسپەكپىن.
بىرىنشىدەن، مەملەكەتتىك ورگانداردىڭ ەكى اپتالىق كارانتين شارالارىن ەنگىزۋى - وقشاۋلانۋدىڭ ءالى كۇنگە دەيىن ەڭ ماڭىزدى الدىن الۋ شاراسى ەكەنىن دالەلدەيدى. سوندىقتان مۇمكىندىگىنشە - جانۇيالىق مەرەكەلەر سىندى توي- تومالاقتى ۋاقىتشا توقتاتا تۇرىڭىزدار. بۇل شارا ارقىلى ءبىز ەگدە تارتقان ادامداردىڭ، ياعني قاۋىپ توبىنداعى ادامداردىڭ ءومىرى مەن دەنساۋلىعىن ساقتايمىز»، - دەدى ول.
ونىڭ اتاپ وتۋىنشە، ەكىنشىدەن، جەكە گيگيەنالىق تالاپتاردى قاتاڭ ساقتاۋ قاجەت. بۇل كەز كەلگەن ينفەكسيالىق اۋرۋدىڭ الدىن الۋ جولى سانالادى.
«جەكە گيگيەنالىق تالاپتار ءار ازاماتتىڭ ءومىر ءسۇرۋ سالتىنىڭ ءبىر بولىگىنە اينالعانى انىق. سونى ودان ارى قاراي ۇستانا بەرۋىمىز قاجەت. قولدى كەمىندە 20 سەكۋند سابىنمەن جۋۋ، كوپ ادام شوعىرلانعان جەردە ماسكا تاعۋ، انتيباكتەريالدى ەرىتىندىلەرمەن قولدى ءجيى وڭدەپ وتىرۋ، تۇشكىرۋ، جوتەلۋ كەزىندە رەسپيراتورلى ەتيكەت قاعيدالارىن ساقتانۋ كەرەك»، - دەدى دارىگەر- ينفەكتسيونيست.
بايان رىسبەك قىزى ۇشىنشىدەن، يممۋنيتەتتى جوعارىلاتۋعا ارنالعان شارالاردى ۇستانۋ، كۇندىزگى جانە تۇنگى ۇيقىنىڭ بالانسىن ساقتاۋ، دارۋمەندەرگە بايىتىلعان دۇرىس تاماقتانۋ راتسيونىن ساقتاۋ، سترەسستىك جاعدايلاردىڭ مەيلىنشە الدىن الۋ، سپورتپەن شۇعىلدانۋ جانە بارىنشا پوزيتيۆتى كوڭىل- كۇيدى ساقتاۋعا تالپىنۋ كەرەكتىگىن ايتادى. دارۋمەندەرگە باي تاڭقۋراي، قاراقات سىندى جەمىس- جيدەكتەردى تۇتىنۋعا كەڭەس بەرەدى.
«تورتىنشىدەن، ەگەر سىزدە ارتەريالدى گيپەرتونيا، قانت ديابەتى، سەمىزدىك، سوزىلمالى جۇرەك، وكپە اقاۋلارى سىندى قوسالقى اۋرۋلار بار بولسا، وندا سول اۋرۋ بويىنشا ەمدەۋشى دارىگەر جازىپ بەرگەن نەگىزگى ەم جوسپارىن توقتاتپاي، سوزىلمالى اۋرۋىڭىزدى ءورشىتىپ الماۋلارىڭىز قاجەت. ال ەگەر COVID-19 اۋرۋىنا شالدىعىپ، اۋرۋحاناعا جاتاتىن بولساڭىز، قوسالقى اۋرۋدان قابىلداپ جۇرگەن ءدارى- دارمەكتەرىڭىزدى وزىڭىزبەن الىپ جۇرگەنىڭىز ءجون. سەبەبى، COVID-19 اۋرۋىنىڭ اسقىنۋىنا قوسالقى اۋرۋلارىڭىز دا سەبەپ بولىپ قالۋى مۇمكىن»، - دەدى بايان تۇردالينا. اۆتور: مارلان جيەمباي