بۇگىن - استانا كۇنى

نۇر- سۇلتان. قازاقپارات - بۇگىن قازاقستاندىقتار استانامىز - نۇر- سۇلتان قالاسىنىڭ مەرەكەسىن اتاپ وتەدى، دەپ حابارلايدى قازاقپارات ءتىلشىسى.

1994 -جىلى قازاقستان رەسپۋبليكاسى جوعارعى كەڭەسىندە قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قازاقستاننىڭ استاناسىن الماتىدان اقمولاعا كوشىرۋ تۋرالى ۇسىنىس جاسادى. 1997 -جىلى قازاننىڭ 20-سىندا استانانى اۋىستىرۋ تۋرالى جارلىققا قول قويدى. 1998 -جىلى 6 - مامىردا اقمولا قالاسىنىڭ اتاۋى استانا بولىپ وزگەردى. 1998 -جىلى ماۋسىمنىڭ 10-ىندا جاڭا ەلوردانىڭ حالىقارالىق تۇساۋكەسەر ءراسىمى ءوتتى. 2019 -جىلى 20 - ناۋرىزدا قازاقستان رەسپۋبليكاسىنىڭ پرەزيدەنتى قاسىم- جومارت توقايەۆ پارلامەنت پالاتالارىنىڭ بىرلەسكەن وتىرىسىندا ءسوز سويلەپ، ەلباسىنىڭ اتىن ماڭگى ساقتاۋ ءۇشىن استانا قالاسىنىڭ اتاۋىن نۇر- سۇلتان دەپ وزگەرتۋ جونىندە ۇسىنىس جاسادى.

«ءبىز، قازىرگى جانە كەلەشەك ۇرپاق وكىلدەرى، ەلباسىنىڭ ساياسي مۇراسىن جادىمىزدان شىعارماي، قادىر تۇتىپ، نۇرسۇلتان ءابىش ۇلى نازاربايەۆتىڭ تاريحي ەڭبەگىنە لايىقتى قۇرمەت كورسەتۋىمىز قاجەت. ەلباسىنىڭ حالقىمىزعا جانە الەم قاۋىمداستىعىنا سىڭىرگەن ەرەن ەڭبەگى مەن ۇلى ەسىمىن ماڭگى ەستە ساقتاۋىمىز كەرەك. بۇل حالقىمىزدى، اسىرەسە، جاستاردى تاريحقا قۇرمەتپەن قاراۋعا تاربيەلەپ، ەلباسىنىڭ داڭقتى قىزمەتىن ءادىل باعالاۋ ءۇشىن ماڭىزدى. ۇلى زامانداسىمىزدىڭ، قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ اتىن كەلەسىدەي تۇردە ەستە قالدىرۋ قاجەت دەپ سانايىن. ەلوردامىز ونىڭ اتىن يەمدەنىپ، نۇر- سۇلتان دەپ اتالۋى ءتيىس. مۇنداي ۇسىنىس بۇعان دەيىن 2016 -جىلدىڭ 23 -قاراشاسىندا قازاقستان رەسپۋبليكاسى تاۋەلسىزدىگىنىڭ 25 -جىلدىعىنا وراي پارلامەنتارييلەر قابىلدانعان دەكلاراتسيادا ايتىلعان ەدى»، - دەگەن بولاتىن مەملەكەت باسشىسى قاسىم- جومارت توقايەۆ.

سول كۇنى ق ر پارلامەنتى پالاتالارىنىڭ بىرلەسكەن وتىرىسىندا دەپتۋتتار استانانىڭ اتاۋىن نۇر- سۇلتان قالاسى وزگەرتۋ تۋرالى زاڭ قابىلدادى. ال 2019 -جىلعى 23 - ناۋرىزدا ق ر پرەزيدەنتى قاسىم- جومارت توقايەۆ قازاقستان رەسپۋبليكاسىنىڭ استاناسى - استانا قالاسىن قازاقستان رەسپۋبليكاسىنىڭ استاناسى - نۇر- سۇلتان قالاسى دەپ قايتا اتاۋ تۋرالى جارلىققا قول قويدى.

جىل سايىن ەلوردا كۇنى كەڭ كولەمدە تويلانىپ كەلدى. الايدا، وكىنىشكە قاراي بيىل ەلىمىزدى جايلاعان كوروناۆيرۋس ىندەتىنە بايلانىستى بارلىق بۇقارالىق شارالارعا تىيىم سالىنىپ وتىر. ەپيدەميولوگيالىق احۋالعا بايلانىستى بۇعان دەيىن ەلوردا كۇنىنە جوسپارلانعان بارلىق ءىس- شارالار توقتاتىلدى. شارالار تەك ونلاين رەجيمدە وتەدى. ءىس- شارالاردىڭ كوپشىلىگى الەۋمەتتىك سيپاتتا بولادى - ەرەكشە قاجەتتىلىگى بار بالالارعا ارنالعان رەابيليتاتسيالىق ورتالىق، جۇمىسسىز ايەلدەرگە شوب نەگىزدەرىن ۇيرەتەتىن «كاسىپكەر انا» الەۋمەتتىك ورتالىعى، جاعالاۋ اۋدانىندا جەدەل جاردەم ستانساسى مەن «دوكتور ۋ دوما» مەديتسينا ورتالىعى جانە باسقا دا الەۋمەتتىك نىساندار اشىلادى. شارالارعا قاتىساتىن ادام سانى شەكتەلگەن. سونىمەن قاتار ءۇي كەزەگىندەگىلەر مەن ۇلەسكەرلەرگە پاتەر كىلتتەرى تاپسىرىلادى - قاتىسۋشىلار سانى شەكتەۋلى جانە سانيتارلىق نورمالار قاتاڭ ساقتالادى: ماسكا تاعىپ، الەۋمەتتىك قاشىقتىقتى ساقتاۋ كەرەك.

اۆتور: مارلان جيەمباي