جەتىسۋ جاستارى ءوڭىردىڭ كوركەم تابيعاتىن كورسەتە وتىرىپ دومبىرانى ناسيحاتتادى
5 - شىلدە - ۇلتتىق دومبىرا كۇنىنە وراي الماتى وبلىسى جاستار ساياساتى باسقارماسى قازاق حالقىنىڭ ۇلتتىق برەندىنە اينالعان ءتول دومبىرانى ناسيحاتتاۋ، جەتىسۋدىڭ كوركەم تابيعاتى مەن دومبىرا ونەرىن ۇشتاستىرا وتىرىپ، جاستاردىڭ بويىنا وتانشىل رۋحتى دارىتۋ ماقساتىندا نۇرعيسا تىلەنديەۆتىڭ «ءالقيسسا» كۇيىنە بەينەبايان ءتۇسىردى. اتالمىش بەينەبايان ءتول ونەردى ناسيحاتتاۋداعى بىرەگەي باستاما بولىپ تابىلادى. جەتىسۋ جەرىنىڭ دارابوزى، اتاقتى كۇيشى نۇرعيسا تىلەنديەۆتىڭ تۋىندىسىن ەلىمىزگە تانىمال ونەرپازدار ورىندادى.
ولار: ەرجان ەسىركەپ ۇلى - كۇيشى، « ۇلىتاۋ» توبىنىڭ ەكس- سوليسى، جامبىل اتىنداعى قازاق مەملەكەتتىك فيلارمونياسىنىڭ سوليسى، قازاقستان جاستار وداعى سىيلىعىنىڭ لاۋرەاتى، ق ر ۇكىمەتىنىڭ «دارىن» مەملەكەتتىك جاستار سىيلىعىنىڭ لاۋرەاتى، ق ر مادەنيەت قايراتكەرى. نۇركەن نۇرعالي ۇلى ءاشىروۆ - كۇيشى، قازاقستاننىڭ ەڭبەك سىڭىرگەن قايراتكەرى، ق ر مەملەكەتتىك ستيپەندياسىنىڭ يەگەرى، تۇڭعىش پرەزيدەنت - ەلباسى قورى سىيلىعىنىڭ لاۋرەاتى. رۇستەم ناۋرىزوۆ - «قازاق ونەرىنىڭ قايراتكەرى»، ق. بايسەيىتوۆ اتىنداعى ساز كوللەدجىنىڭ ۇستازى، كۇيشى، سازگەر، بىرنەشە مەملەكەتتىك دارەجەدەگى بايقاۋلاردىڭ جۇلدەگەرى. ۇشقىن جامالبەك - ءانشى، «الاش ۇلى» توبىنىڭ ەكس- ءسوليسى، سازگەر، كۇيشى.
بەينەجازبادا الماتى وبلىسىنىڭ كولساي، قايىندى كولدەرى، ايعايقۇم، شارىن شاتقالى سىندى كورىكتى جەرلەرىندە دومبىراشىلاردىڭ «ءالقيسسا» كۇيىن ورىنداعاندارى كورسەتىلەدى.
اۆتور: سامال قابىشيەۆا