ەلوردادا ۇلتتىق قورعانىس ۋنيۆەرسيتەتى ماگيسترانتتارىنا وفيتسەرلىك شەن تاپسىرۋ ءراسىمى ءوتتى

نۇر- سۇلتان. قازاقپارات - ەلوردادا قورعانىس مينيسترلىگى اسكەري جوعارى وقۋ ورىندارىنىڭ ۇزدىك تۇلەكتەرىنە وفيتسەرلىك شەن تاپسىرۋ سالتاناتتى ءراسىمى ءوتتى، دەپ حابارلايدى قازاقپارات ق ر قورعانىس مينيسترلىگىنىڭ باسپاءسوز قىزمەتىنە سىلتەمە جاساپ.

قورعانىس ءمينيسترى گەنەرال- لەيتەنانت نۇرلان ەرمەكبايەۆتىڭ قولىنان قۇرلىق اسكەرلەرى اسكەري ينستيتۋتىنىڭ، راديوەلەكترونيكا جانە بايلانىس اسكەري- ينجەنەرلىك ينستيتۋتىنىڭ 10 تۇلەگى لەيتەنانت شەنىن الدى. قورعانىس ۆەدومستۆوسىنىڭ باسشىسى جاس وفيتسەرلەرگە اسكەردىڭ توتەنشە جاعداي جانە كارانتين رەجيمىن قولداۋعا قاتىسقانىن ەسكە سالىپ، مىڭداعان اسكەري قىزمەتشىلەردىڭ كۇشىمەن ورتاق قاۋىپسىزدىكتى قامتاماسىز ەتۋ ءۇشىن ماڭىزدى ءىس- شارالار وتكىزىلگەنى تۋرالى ايتتى.

«سىزدەر جانە باسقا دا لەيتەنانتتاردى وقۋدىڭ ءساتتى اياقتالۋىمەن جانە اسكەري ماماندىقتى يگەرۋىمەن قۇتتىقتايمىن. وسى كۇردەلى كەزەڭدە ەل مەن الەم ءۇشىن قارۋلى كۇشتەر پاندەميامەن كۇرەسكە بەلسەندى قاتىسۋدا. ارنايى بولىمشەلەردىڭ كۇشىمەن مىڭ شاقىرىم جولدى، ەلدى مەكەندەردىڭ تۇرعىن ءۇي جانە الەۋمەتتىك نىسانداردى زالالسىزداندىرۋ جۇمىستارى جالعاسۋدا. توتەنشە جاعداي كەزىندە اسكەري قىزمەتشىلەر پاترۋلدەۋ جانە توسقاۋىل بەكەتتەرىندە قىزمەت اتقاردى. ولاردىڭ اراسىندا قويىلعان مىندەتتەردى ابىرويمەن ورىنداعان كۋرسانتتار دا بولدى.

اسكەري دارىگەرلەر ادامداردى كوروناۆيرۋستان ەمدەۋگە كۇش سالىپ جاتىر. اسكەري- كولىك اۆياتسياسى جۇزدەگەن وتانداستاردى ەۆاكۋاتسيالاپ، گۋمانيتارلىق كومەكتى جەتكىزۋدى جالعاستىرۋدا. سونىمەن قاتار، اسكەري قىزمەتشىلەر تۇركىستان وبلىسى ماقتارال اۋدانىنىڭ سۋ باسقان اۋىلدارىنداعى اۆاريالىق- قۇتقارۋ جۇمىستارىنا قاتىستى. وسىنىڭ بارلىعى قارۋلى كۇشتەردىڭ نەگىزگى مىندەتتەرىنە كىرمەيدى، ايتسە دە، ەلىمىزدىڭ يگىلىگى ءۇشىن ءبىز اسكەرلەردى دايىنداپ، ازاماتتارىمىزدىڭ قاۋىپسىزدىگىن ودان ءارى قامتاماسىز ەتەتىن بولامىز»، - دەدى ول.

مينيستر جاس وفيتسەرلەرگە ودان ءارى قىزمەتتە تابىس پەن دەنساۋلىق تىلەدى. جاس وفيتسەرلەردىڭ ءاربىرى ءۇشىن بۇل ەرەكشە كۇن. ولار اسكەري عىلىم مەن ءبىلىمدى تەرەڭ مەڭگەرىپ، وزدەرىنىڭ اسكەري ماماندىقتارىنىڭ جاڭا داعدىلارىن وقىدى. ەندى مۇنىڭ ءبارىن ءىس جۇزىندە جۇزەگە اسىرۋ مىندەتى تۇر.

ايتا كەتەيىك، 2020 -جىلى قۇرلىق اسكەرلەرىنىڭ اسكەري ينستيتۋتى 390 لەيتەنانت، راديوەلەكترونيكا جانە بايلانىس اسكەري- ينجەنەرلىك ينستيتۋتى 141 لەيتەنانت، اۋە قورعانىسى كۇشتەرىنىڭ اسكەري ينستيتۋتى - 15 اسكەري مەديتسينا وفيتسەرىن، ال قازان ايىندا ج و و - دا ۇشۋ جانە ينجەنەرلىك ماماندىقتاردىڭ 113 كۋرسانتى وقۋىن اياقتايدى.

ق ر تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىندە ماگيستراتۋرا وفيتسەرلەرىنىڭ 22- تولقىنى ءبىتىردى. بيىلعى جىلى 141 ماگيسترانت، ونىڭ ىشىندە تاجىكستان قارۋلى كۇشتەرىنىڭ التى وكىلى جانە ۇ ق ش ۇ- عا مۇشە مەملەكەتتەردىڭ قارۋلى كۇشتەرى ءۇشىن اسكەري كادرلاردى بىرلەسىپ دايارلاۋ شەڭبەرىندە وقۋدان وتكەن قىرعىزستاننىڭ ەكى وفيتسەرى وزدەرىنىڭ ماگيسترلىك جۇمىستارىن ءساتتى قورعادى.

ماگيسترانتتار وقىتۋشىلارعا، ادىسكەرلەرگە، عىلىمي جەتەكشىلەرگە كورسەتكەن شىدامدىلىقتارى، وقۋ ۇدەرىسىندە تىلەكتەستىك قارىم- قاتىناسى جانە جەكە كوزقاراسى ءۇشىن العىستارىن ءبىلدىردى. ولار ۋنيۆەرسيتەتتە العان جانە جەتىلدىرگەن ءبىلىم مەن بىلىكتەرىن ارميانىڭ قورعانىس قابىلەتىن جانە اسكەري ىنتىماقتاستىقتى نىعايتۋعا باعىتتالاتىنىنا سەندىردى. ەلوردا كۇنى قارساڭىندا ۇلتتىق قورعانىس ۋنيۆەرسيتەتىندە قازاقستاننىڭ تۇڭعىش پرەزيدەنتى - ەلباسى مونۋمەنتى سالتاناتتى تۇردە اشىلدى. سول كۇنى الماتىدا راديوەلەكترونيكا جانە بايلانىس اسكەري- ينجەنەرلىك ينستيتۋتى كۋرسانتتارىنىڭ 14- شىعارىلىمى ءوتتى. 141 كۋرسانت ج و و- دا سەگىز ماماندىق بويىنشا وقۋىن اياقتاپ، توعىز كۋرسانت ۇزدىك ديپلوم يەگەرى اتاندى.