15:01, 04 - شىلدە 2020 | GMT +6
شەكتەۋ شارالارى كۇشەيتىلەدى: بالالاردىڭ اۋلادا ويناۋىنا رۇقسات بەرىلە مە
نۇر- سۇلتان. قازاقپارات - 5 - شىلدەدەن باستاپ ەلىمىزدە شەكتەۋ شارالارى كۇشەيتىلگەننەن كەيىن بالالاردىڭ اۋلادا ويناۋىنا بولا ما؟ بۇل ساۋالعا بۇگىن ق ر باس مەملەكەتتىك سانيتار دارىگەرى ايجان ەسماعامبەتوۆا جاۋاپ بەردى، دەپ حابارلايدى قازاقپارات ءتىلشىسى.
«قاۋلىدا بالالاردىڭ اۋلاعا شىعۋىنا تىيىم سالۋ كوزدەلمەگەن. دەگەنمەن، ءبىز كامەلەتكە تولماعان بالالار كوشەدە، اۋلادا ەرەسەكتەرمەن بىرگە عانا جۇرۋگە، سونىمەن قاتار كەز كەلگەن بايلانىستان بارىنشا اۋلاق بولۋعا كەڭەس بەرەمىز. ياعني، ءبىزدىڭ كەڭەسىمىز بالالار اۋلادا ويناعان كەزدە ءبىر وتباسىنىڭ مۇشەلەرى شەگىندە عانا جۇرگەنى دۇرىس. وزگە بالالارمەن بايلانىستا بولماۋعا تىرىسۋ قاجەت. ويتكەنى، اۋرۋدىڭ بىرەۋدەن بىرەۋگە تارالۋى ءجۇرىپ جاتىر»، - دەدى باس سانيتار دارىگەر ورتالىق كوممۋنيكاتسيالار قىزمەتىندەگى بريفينگ بارىسىندا ب ا ق وكىلدەرىنىڭ ساۋالىنا وراي.
سونىمەن قاتار ول كارانتيننىڭ بارلىق شارالارى ۆيرۋستىڭ ادامنان ادامعا تارالۋىنىڭ الدىن الۋعا تىزبەكتى ۇزۋگە باعىتتالىپ وتىرعاندىعىن باسا ايتتى.
اۆتور: مارلان جيەمباي