مەكتەپ وقۋشىلارىنا ارنالعان «دومبىرا» كىتابى تانىستىرىلدى
كونفەرەنسياعا قازاق ۇلتتىق ونەر ۋنيۆەرسيتەتىنىڭ پرورەكتورى، ونەرتانۋ عىلىمدارىنىڭ دوكتورى تويجان ەگىنبايەۆا، قازاقستاننىڭ ەڭبەك سىڭىرگەن قايراتكەرى، تانىمال كۇيشى جانعالي جۇزبايەۆ، قۇرمانعازى اتىنداعى قازاق ۇلتتىق كونسەرۆاتورياسى، «ءداستۇرلى مۋزىكا» فاكۋلتەتىنىڭ دەكانى، ونەر تانۋ عىلىمدارى Phd دوكتورى ەرجان جامەڭكەيەۆ، نۇر- سۇلتان قالالىق مەملەكەتتىك اكادەميالىق فيلارمونياسىنىڭ باس ديرەكتورى ەرلان داكەنوۆ، قازاقستاننىڭ ەڭبەك سىڭىرگەن قايراتكەرى، كومپوزيتور، ونەرتانۋ عىلىمدارىنىڭ ماگيسترى القۋات قازاقباي، نۇر- سۇلتان قالاسىنداعى وقۋشىلار سارايىنىڭ باس ديرەكتورى ەربول ىرگەباي، تاتتىمبەت اتىنداعى ونەر كوللەدجىنىڭ ديرەكتورى سەرجان مۇسايىنوۆ، «قازاق كونسەرت» مەملەكەتتىك كونسەرتتىك بىرلەستىگىنىڭ «حالىق قازىناسى» ۇجىمىنىڭ جەتەكشىسى ەرلان رىسقالي، بەلگىلى عالىمدار، ءبىرقاتار سالالىق، وقۋ ورىندارى مەن ونەر سالاسىنداعى ۇيىمداردىڭ باسشىلارى مەن وكىلدەرى قاتىستى.
القالى جيىن اياسىندا حالىقارالىق تۇركى اكادەمياسى مەملەكەت باسشىسىنىڭ تىكەلەي تاپسىرماسى بويىنشا دايىنداپ شىعارعان «دومبىرا» وقۋ قۇرالىنىڭ تۇساۋكەسەر ءراسىمى ءوتتى. وسكەلەڭ ۇرپاققا ارنالعان وقۋلىقتىڭ اۆتورى بەلگىلى كۇيشى، قازاق ۇلتتىق ونەر ۋنيۆەرسيتەتىنىڭ پروفەسسورى - جانعالي جۇزبايەۆ.
«ايتا كەتۋ كەرەك، قازاقستان رەسپۋبليكاسىنىڭ پرەزيدەنتى قاسىم- جومارت كەمەل ۇلى توقايەۆتىڭ 2019 -جىلدىڭ 7 - ماۋسىمىندا «ۇلتتىق دومبىرا كۇنى» مەرەكەسىندە «دومبىرانى ارنايى ءپان رەتىندە مەكتەپتەرگە ەنگىزۋ كەرەكتىگى جونىندەگى پىكىرى جاريالانعان بولاتىن. وسىعان وراي جالپى ءبىلىم بەرەتىن مەكتەپتەردە قاسيەتتى اسپابىمىزدى وقىتۋ جۇمىستارى قارقىن الىپ، «دومبىرا» پانىنە ارنالعان وقۋ قۇرالىنا قاجەتتىلىك تۋىندادى. اتالعان وقۋ قۇرالىن وتكەن جىلدىڭ قاراشا ايىندا حالىقارالىق تۇركى اكادەمياسىنىڭ باسشىسى دارحان قىدىرالى ق ر پرەزيدەنتى قاسىم- جومارت توقايەۆتىڭ قابىلداۋىندا «دومبىرا» وقۋ قۇرالىنىڭ جوباسىن تانىستىرعان ەدى»، - دەلىنگەن حالىقارالىق تۇركى اكادەمياسىنىڭ باسپا ءسوز حابارلاماسىندا.
