كوروناۆيرۋس قاۋپىن جاقىندارىمىزدان ايرىلعاندا عانا تۇسىنە باستادىق - نادەجدا پەتۋحوۆا
بۇل تۋرالى ق ر دەنساۋلىق ساقتاۋ مينيسترلىگى جانىنداعى قوعامدىق كەڭەستىڭ، ەۋرازيالىق مەديتسينالىق قاۋىمداستىقتىڭ ءتورايىمى نادەجدا پەتۋحوۆا ايتتى، دەپ حابارلايدى قازاقپارات ءتىلشىسى.
«ەلىمىزدە كوروناۆيرۋس ىندەتىنە بايلانىستى وتە كۇردەلى احۋال قالىپتاسىپ وتىر. ىندەت باستالعان كەزدە اۋرۋعا شالدىققانداردىڭ كوپ بولماۋى حالىق اراسىندا وسىناۋ جىمىسقى دەرتتىڭ اۋىرلىعى مەن توسىننان كەلەتىندىگىنە قاتىستى تۇسىنىكتىڭ قالىپتاسپاۋىنا سەبەپ بولدى. ءبىز توتەنشە جاعداي رەجيمى اياقتالا سالىسىمەن ەپيدەمياعا قارسى شارالاردى ساقتاۋدى قويدىق. بۇل ءدال قازىرگى ۋاقىتتاعى اۋرۋعا شالدىعۋلار مەن ءولىم-ءجىتىمنىڭ وسىمىنە الىپ كەلدى. دارىگەرلەر وتە اۋىر جاعدايدا جۇمىس ىستەۋدە. شامادان تىس جۇكتەمە مەن پسيحولوگيالىق سترەسس سالدارىنان وزدەرى دە ناۋقاستانىپ جاتىر»، - دەپ جازدى ول Facebook-پاراقشاسىندا.
وسى رەتتە قاۋىمداستىق ءتورايىمى مەملەكەتتىك كوميسسيا ەلدەگى ىندەتپەن اۋىرعاندار سانىن تومەندەتۋ ماقساتىندا، ەپيدەميولوگيالىق جاعدايدى تۇراقتاندىرۋ ءۇشىن شەشىم قابىلداعانىن اتاپ وتەدى.
«ءبىز كورەرمەن كوپ جينالاتىن ويىن- ساۋىق شارالارىنا، وتباسىلىق توي-تومالاقتارعا، سالوندار مەن شاشتارازدارعا، فيتنەس- كلۋبتارعا، ءدىني نىساندارعا بارۋ ينفەكسيانىڭ جىلدام تارالۋىنا، ەڭ قورقىنىشتىسى ءولىم-ءجىتىم ارتۋىنا الىپ كەلەتىندىگىن ايقىن ءتۇسىنۋىمىز كەرەك. ءوزىمىزدى جانە جاقىندارىمىزدى قورعايىق. ەڭ قۇندىمىز - بۇل ءومىر مەن دەنساۋلىق. وسىناۋ شىندىقتى ءبىز جاقىندارىمىزدان ايىرىلعاندا عانا تۇسىنە باستايمىز. كارانتين شارالارىن ساقتاۋ، تازالىق شارالارىن تىڭعىلىقتى ورىنداۋ جانە بولاشاققا سەنىممەن قاراۋ بارلىعىمىزعا وسىناۋ كۇردەلى كەزەڭدى ەڭسەرۋگە مۇمكىندىك بەرەدى»، - دەدى نادەجدا پەتۋحوۆا.