بەك ەير كومپانياسىنا ەكىنشى سوت ءىسى قوزعالدى

نۇر-سۇلتان. قازاقپارات – ق ر ساۋدا جانە ينتەگراتسيا مينيسترلىگىنىڭ تۇتىنۋشىلاردىڭ قۇقىقتارىن قورعاۋ كوميتەتى «بەك ەير» ا ق-قا ەكىنشى سوت ءىسىن قوزعادى، دەپ حابارلايدى قازاقپارات ءتىلشىسى.

«بۇگىن، 2020 -جىلعى 3-شىلدەدە تۇتىنۋشىلاردىڭ قۇقىقتارىن قورعاۋ كوميتەتى (ت ق ق ك) «بەك ەير» ا ق-نا قاتىستى الماتى قالاسىنىڭ تۇركسىب اۋداندىق سوتىنا ەكىنشى سوت ءىسىن باستاۋعا جىبەردى. ت ق ق ك جالپى قۇنى 5902916 تەڭگەگە 177 بيلەت ساتىپ العان 81 ادامنىڭ مۇددەسىنە وكىلدىك ەتەدى. ت ق ق ك تالابى - بۇدان بۇرىن اۋە رەيستەرگە ساتىپ الىنعان بيلەتتەردىڭ تولىق قۇنىن قايتارۋعا «بەك ەير» ا ق قىزمەتىنە تۇتىنۋشىلاردىڭ قۇقىعىن مويىنداتۋ جانە تۇتىنۋشىنىڭ پايداسىنا اۋە بيلەت ءۇشىن تولەنگەن سومانى قايتارۋ»، - دەلىنگەن اتالعان مينيسترلىك تاراتقان اقپاراتتا.

بارلىق كەلىپ تۇسكەن وتىنىشتەر سوت ىسىنە قوسىمشا ەنگىزىلەدى. ول ءۇشىن تۇتىنۋشىلار ت ق ق ك- نە بەلگىلەنگەن فورماداعى ءوتىنىشتى جىبەرۋ كەرەك.

ونى مىنا سىلتەمەدەن جۇكتەپ الۋعا بولادى. وتىنىشتەر ەلەكتروندىق ۇكىمەتتىڭ پورتالى جانە تەلەگرامم بوت ارقىلى قابىلدانادى.

وتىنىشپەن قاتار مىنالاردى قوسا تىركەۋ كەرەك:

جەكە باسىن كۋالاندىراتىن قۇجاتتاردىڭ كوشىرمەلەرى (جەكە كۋالىك، ءتولقۇجات، تۋۋ تۋرالى كۋالىك)؛ تولەمدى راستايتىن قۇجاتتاردىڭ كوشىرمەلەرى (فيسكالدى تۇبىرتەگى جانە ت. ب. )؛ بيلەتتىڭ كوشىرمەسى؛ ءوتىنىش بەرۋشىنىڭ بانكتىك دەرەكتەمەلەرى تۋرالى مالىمەتتەر (بانكتەن انىقتاما)؛ تۇتىنۋشى وسى ماسەلە بويىنشا بەك ەير كومپانياسىمەن بۇرىن بايلانىسقاندىعىن راستايتىن قۇجاتتار (كوشىرمەلەر، سكرينشوتتار جانە ت. ب.).

اۆتور: مارلان جيەمباي