ناۋقاستىڭ ۇيىنە بارىپ، كوروناۆيرۋسقا تەست الاتىن موبيلدى بريگادالاردىڭ قىزمەت قۇنى قانشا

نۇر-سۇلتان. قازاقپارات – ق ر دەنساۋلىق ساقتاۋ ۆيتسە-ءمينيسترى اجار عينيات كوشپەلى موبيلدى بريگادالاردىڭ اقىلى قىزمەت قۇنىنىڭ مولشەرىن اتادى، دەپ حابارلايدى قازاقپارات ءتىلشىسى.

«مينيستر مىرزا ايتىپ كەتكەندەي، ەمحانالاردا جانە جەدەل جاردەم قىزمەتىندە موبيلدى بريگادالار قۇرىلادى. ولار قازىرگى تاڭدا جۇمىسىن باستاپ كەتتى. تاريفى ازىرلەندى. قۇنى - 5400 تەڭگە»، - دەدى ول و ك ق-داعى باسپا ءسوز ءماسليحاتىندا تىلشىلەردىڭ سۇراعىنا جاۋاپ بەرە وتىرىپ. ۆيتسە-ءمينيستردىڭ ايتۋىنشا، ك ۆ ي نەمەسە ج ر ۆ ي بەلگىسى بار ادامدار جەدەل جاردەم شاقىرسا، موبيلدى بريگادالار دارىگەرلەرمەن بىرگە بارىپ، سول جەردە تەست الادى.

«شاقىرۋعا تولەنىپ وتىرادى. بۇل بريگادا ءبىر ادامعا ەكى-ءۇش رەت كەلمەيدى. ويتكەنى تەست ءبىر-اق رەت الىنىپ، ك ۆ ي بار ما، جوق پا - انىقتالىپ، ۋچاسكەلىك دارىگەرگە اقپارات بەرىلەدى»، - دەدى ول.

ەسكە سالا كەتسەك، بۇدان بۇرىنعى باسپا ءسوز ءماسليحاتىندا دەنساۋلىق ساقتاۋ ءمينيسترى الەكسەي سوي قازاقستاندا كوروناۆيرۋستى جەڭىل جانە سيمپتومسىز كوتەرەتىن ادامدارعا كوشپەلى بريگادالار اقىلى قىزمەت كورسەتەتىنىن حابارلاعان بولاتىن. ال ۆيتسە-مينيستر اجار عينيات وسى موبيلدى توپتاردىڭ جۇمىس ءتارتىبىن ءتۇسىندىرىپ بەردى.