+7 (701) 759 90 19
19 °С : نۇر-سۇلتان
21 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

ولگەن ادامعا باتا قىلمادىم دەپ ۇيالماڭىز، ونىڭ باسقا جولدارى بار - باس ءمۇفتي

3 شىلدە 12:13
:ءبولىسۋ
ولگەن ادامعا باتا قىلمادىم دەپ ۇيالماڭىز، ونىڭ باسقا جولدارى بار - باس ءمۇفتي

نۇر-سۇلتان. قازاقپارات - ولگەن ادامعا باتانى قاشىقتان بەرۋگە دە بولادى. بۇل تۋرالى قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ايتتى، دەپ حابارلايدى.

«حالقىمىزدا «اۋىر جول باتاڭدى سىنايدى، اۋىر ءىس ادامدى سىنايدى» دەگەن ناقىل ءسوز بار. بۇل سىناق جاسقا دا، جاسامىسقا دا اۋىر تيۋدە. قازىر كارانتين ۋاقىتى، ادامدار ءارتۇرلى ويلارعا سالىنىپ، كەيبىرەۋى اۋىرىپ، ەمدەلىپ جاتىر. اللا تاعالا بارلىعىنىڭ دەنىنە ساۋلىق بەرسىن. اللا شيپا بەرسىن! ال ەندى دۇنيە سالعاندارعا اللا يمانىن جولداس ەتسىن، كىتابىن وڭ جاعىنان بەرسىن. قازىرگى تاڭدا ءبىز بارىنشا سابىر ەتىپ، بىرگە بولىپ، ءبىر-بىرىمىزگە قولداۋ جاساپ، سىناقتان امان-ەسەن ءوتۋدى اللادان سۇراساق، اللا نيەتىمىزدى قابىل ەتەدى»، - دەدى باس ءمۇفتي ورتالىق كوممۋنيكاتسيالار قىزمەتىندەگى بريفينگ بارىسىندا.

ناۋرىزباي قاجى تاعان ۇلى ەلباسى «ەل بولىپ بىرىگىپ، بۇل سىناقتى اللا قالاسا مىندەتتى تۇردە جەڭەمىز» دەپ ايتقانىن، مەملەكەت باسشىسى دا تالاي جيىن وتكىزىپ، وسى ماسەلە اياسىندا كوپ شەشىمدەر قابىلداپ جاتقانىن ەسكە سالىپ ءوتتى.

«بىزگە قازىرگى ۋاقىتتا كەرەگى - بارىنە تۇسىنىستىكپەن قاراپ، كارانتين تالاپتارىن قاتاڭ ساقتاپ، ءبىر-ءبىرىمىزدى قۇرمەت قىلۋ، ءبىر-ءبىرىمىزدىڭ ءومىرىمىز بەن دەنساۋلىعىمىزدى سىيلاۋ. بۇل وتە ماڭىزدى بولىپ وتىر. قازاقتىڭ سالتىندا تويعا بارۋ، تويدا تىلەك ايتۋ، ادام ومىردەن وتكەندە توپىراق سالۋ دەگەن ءداستۇر بار. ءبىراق، قازىرگى تاڭدا وسى داستۇرگە تۇسىنىستىكپەن قاراپ، ودان دا ماڭىزدى ادام ءومىرى ەكەنىنە كوڭىل ءبولىپ، ادامنىڭ اماندىعىنا بارشامىز ۇلەس قوسساق دۇرىس بولادى»، - دەدى ول.

باس ءمۇفتي اباي زامانىندا سەمەيگە بارعاندا وسىنداي ءبىر ىندەتتىڭ تاراپ جاتقانىن ەستىپ، حالىقتى اۋرۋدان ساقتاپ قالۋ ءۇشىن جانازا جيىندارىندا ادام از بولۋى كەرەكتىگىن ايتقانىن ەسكە سالادى.

«قازىرگى تاڭدا دا توي-جيىنداردى ۋاقىتشا توقتاتۋ كەرەك. ارينە، ءومىر بار جەردە ءولىم بار. ونداي جاعدايدا جاقىندارىمەن، از اداممەن اتقارىپ، دۇعادا، تىلەكتە بولساق. قازاق بولعاننان كەيىن باتا بەرۋ دەگەن جولدارى بار. قازىرگى تاڭدا باتانى بارماي-اق، قاشىقتان بەرەتىن مۇمكىندىگى بار. «باتا بەرمەي قالسام ۇيات بولادى-اۋ، بارۋىم كەرەك» دەپ ويلاساڭىز، وندا قازىرگى جاعدايدا باتاڭىزدى قاشىقتان بەرىپ، دۇعا جاساڭىزدار. قازىر ءبارىمىز دە ءبىر-ءبىرىمىزدى تۇسىنەمىز»، - دەدى ناۋرىزباي قاجى تاعان ۇلى.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات