جانازا مەن قۇدايى اسقا قاتىسقاندا قانداي ەرەجەنى ساقتاۋ قاجەت - ق م د ب
«ەلىمىزدى دۇرلىكتىرگەن ىندەتتىڭ قاۋپى كۇننەن-كۇنگە ءورشىپ بارا جاتقانى وزدەرىڭىزگە ءمالىم. اۋرۋ ايتىپ كەلمەيدى. «ساقتانساڭ - ساقتايمىن» دەمەكشى تورتكۇل الەمگە قاۋىپ توندىرگەن دەرتكە نەمقۇرايلىق تانىتۋ ءوزىمىز ءۇشىن عانا ەمەس جانىمىزداعى جانداردىڭ ومىرىنە دە كەرى اسەرىن تيگىزەرى حاق.
وسى ورايدا، قازاقستان مۇسىلماندارى ءدىني باسقارماسى ەلىمىزدىڭ مۇسىلمان قاۋىمىن جانازا نامازى مەن قۇدايى اسقا قاتىسۋدىڭ كەلەسىدەي ەرەجەسىن ساقتاۋعا ۇندەيدى.
ءبىرىنشى جانازا نامازىنا قاتىستى تالاپتاردى ورىنداۋعا:
جانازا نامازىنا ءبىر عانا ءدىني قىزمەتكەردىڭ قاتىسۋىنا؛
جانازا نامازىنا تەك وتباسى جانە جاقىن تۋمالارىنىڭ قاتىسۋىنا؛
جانازاعا جالپى سانى 30 كىسىدەن ارتىق جينالماۋعا؛
بويىندا دەنە قىزۋى نەمەسە جوتەلى بار كىسىنىڭ جانازا نامازىنا مۇلدە قاتىسپاۋىنا؛
جانازا نامازىنا كەلۋشى كىسى مىندەتتى تۇردە سانيتارلىق نورمالاردى، اتاپ ايتقاندا بەتپەردە تاعۋ، مەديتسينالىق قولعاپ كيۋ جانە ەكى مەتردەن كەم ەمەس اراقاشىقتىق ساقتاۋعا شاقىرادى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، ىندەتتەن قايتىس بولعان ءمايىتتى دارىگەردىڭ نۇسقاۋلىعىنا ساي جۋۋ كەرەك.
ودان بولەك، مىنا تالاپتاردى ساقتاۋ قاجەت:
- جانازا نامازى مەن ۋاعىزدىڭ جالپى ۋاقىتىن 5 مينۋتتان اسىرماۋ؛
- جانازا نامازى بارىسىندا قول الىسىپ امانداسپاۋ؛
- جانازا نامازىنىڭ سابىن تۇزەگەندە كەمىندە ەكى مەتر قاشىقتىقتى ساقتاۋ؛
- قابىر باسىندا ءمايىت جەر قوينىنا تاپسىرىلعاننان كەيىن جاماعاتتى تەزدەتىپ قايتارۋ؛
- جاسى ۇلكەن كىسىلەر، دەنساۋلىعى ناشار ادامدار (ەر مەن ايەل) جانە جاس بالالار جانازا نامازدارىنا قاتىسپاۋى ءتيىس؛
- قوناق اسىن وتكىزۋگە بولمايدى؛
- جانازادان كەيىنگى استى وتكىزبەۋ نەمەسە وتباسى مۇشەلەرىمەن شەكتەلۋ كەرەك.
«قۇدايى اسقا - جەتىسى، قىرقى، جىلى جانە تاعى باسقاعا قاتىستى تالاپتاردى مىندەتتى تۇردە ورىنداعان ءجون»، - دەدى نايب ءمۇفتي.