قاراعاندى تۇرمەسىندە سوتتالعاندار دومبىرا جاساپ، مادەنيەت ۇيىنە سىيلادى
سونداي-اق شەبەرلەر اباي دومبىراسىن جاساۋدى قولعا الماق، دەپ حابارلايدى قازاقپارات ءتىلشىسى.
ەلباسى نۇرسۇلتان نازاربايەۆتىڭ شەشىمىمەن شىلدە ايىنىڭ العاشقى جەكسەنبىسى ۇلتتىق دومبىرا كۇنى بولىپ جاريالانعانى بەلگىلى. سول سەبەپتى، ەلىمىزدە جىل سايىن اتالىپ وتىلەتىن بۇل مەرەكەنىڭ ۇلتتىق رۋحانياتىمىزعا قوساتىن ۇلەسى زور.
بۇل كيەلى اسپاپتىڭ قازاق حالقىنىڭ تاريحىندا الاتىن ورنى ەرەكشە. دومبىرا - قازاقتىڭ كيەسى، جان-دۇنيەسى، رۋحاني قازىناسى.
ا ك - 18 مەكەمەسىندە حالقىمىزدىڭ وسىناۋ كيەلى ونەرىنە قۇرمەت كورسەتۋ، ونى جاڭعىرتۋ ءىسى جولعا قويىلعان. ونىڭ ءبىر دالەلى - مەكەمەدە جازاسىن وتەۋشىلەر ءۇشىن اشىلعان قولونەر بۇيىمدارى سەحىندا حالقىمىزدىڭ ارداق تۇتار مۋزىكا اسپابى - دومبىرانىڭ ناقىشىنا كەلتىرىلىپ جاسالۋىن ايتۋعا بولادى.
«دومبىرانىڭ وسى قالپىندا دۇنيەگە كەلۋ تاريحى تەرەڭدە جاتىر. شىڭعىسحاننىڭ ۇلكەن ۇلى جوشىنىڭ قايتىس بولعانىن قاھارلى قاعانعا سول كەزەڭدەگى دارىندى كۇيشى، ءبي دە بولعان كەتبۇعا دومبىرانىڭ ۇنىمەن ەستىرتكەنى تاريحتان ايان. جالپى، كيەلى دومبىرانىڭ سان ءتۇرى بار. جاسالۋ ادىستەرى دە ءارتۇرلى. ءبىز دومبىرا جاساۋ ءىسىن جالعاستىرا بەرەتىن بولامىز. قازاق حالقىنىڭ ۇلى اقىنى اباي قۇنانبايەۆتىڭ 175 جىلدىق مەرەيتويى قارساڭىندا اباي ۇلگىسىندەگى دومبىرالار جاساپ شىعارۋ ويىمىزدا بار. بۇعان مەكەمە اكىمشىلىگى بارلىق جاعدايدى جاساپ قويعان. قۇرال-جابدىقتار جەتكىلىكتى. وسى ماڭىزدى ءىستىڭ باسى-قاسىندا بولىپ، قولداۋ كورسەتىپ وتىرعان مەكەمە اكىمشىلىگىنە العىسىمىزدى ايتامىز»، - دەيدى مەكەمەنىڭ سەحىندا دومبىرا جاساۋ ءىسىنىڭ شەبەرى، جازاسىن وتەۋشى.
قازاقتىڭ اقيىق اقىنى مۇقاعالي ماقاتايەۆ: «داريعا، دومبىرامدى بەرشى ماعان، جانىما كەلشى جارىم، كەلشى بالام...» دەپ جىرعا قوسقانىنداي، دومبىرا «مەن قازاقپىن» دەگەن ءار ازاماتتىڭ تورىنەن ورىن الۋى ءتيىس، دەپ سانايدى شەبەر. جانە دە بۇل بۇيىمدارىن قازاق ونەرىن كوپشىلىككە پاش ەتىپ جۇرگەن ونەر ادامدارىنا سىيلىق رەتىندە تابىس ەتۋدى ءجون كورگەن ەكەن.
«مەن بار ونەرىمدى سالىپ جاساپ شىعارعان قازاق حالقىنىڭ تاريحى، مادەنيەتى، ادەبيەتى بولىپ تابىلاتىن وسى ءبىر كيەلى مۋزىكا اسپابى - دومبىرانى قاراباس كەنتىنىڭ مادەنيەت ءۇيىنىڭ يگىلىگىنە پايدالانۋى ءۇشىن شىن نيەتىممەن ۇسىنامىن»، - دەدى ول.