جانازا نامازى مەن قۇدايى استاردى وتكىزۋدە ساقتالۋى ءتيىس تالاپتار جاريالاندى

نۇر-سۇلتان. قازاقپارات - قازاقستان مۇسىلماندارى ءدىني باسقارماسى جانازا نامازى مەن قۇدايى استاردى وتكىزۋدە ساقتالۋى ءتيىس تالاپتاردى جاريالادى، دەپ حابارلايدى قازاقپارات.

«ەلىمىزدى دۇرلىكتىرگەن ىندەتتىڭ قاۋپى كۇننەن- كۇنگە ءورشىپ بارا جاتقانى وزدەرىڭىزگە ءمالىم. اۋرۋ ايتىپ كەلمەيدى. «ساقتانساڭ - ساقتايمىن» دەمەكشى، تورتكۇل الەمگە قاۋىپ توندىرگەن دەرتكە نەمقۇرايلىق تانىتۋ - ءوزىمىز ءۇشىن عانا ەمەس، جانىمىزداعى جانداردىڭ ومىرىنە دە اسەرىن تيگىزەرى حاق»، - دەدى ق م د ب- دان.

وسى ورايدا، باسقارما جانازا نامازى مەن قۇدايى استاردى وتكىزۋدە كەلەسى تالاپتاردى ۇستانۋعا ۇندەيدى: - جانازا نامازىنا ءبىر عانا ءدىني قىزمەتكەردىڭ قاتىسۋى؛

- جانازا نامازىنا تەك وتباسى جانە جاقىن تۋمالارىنىڭ قاتىسۋى؛ - جانازاعا جالپى سانى 30 كىسىدەن ارتىق جينالماۋ؛

- دەنە قىزۋى نەمەسە جوتەلى بار ادامنىڭ جانازا نامازىنا مۇلدە قاتىسپاۋى؛

- جانازا نامازىنا كەلۋشىلەر مىندەتتى تۇردە سانيتارلىق نورمالاردى (بەتپەردە تاعۋ، مەديتسينالىق قولعاپ كيۋ جانە ەكى مەتردەن كەم ەمەس اراقاشىقتىق) ساقتاۋى؛

- كوروناۆيرۋستان قايتىس بولعان ءمايىتتى دارىگەردىڭ نۇسقاۋلىعىنا ساي جۋۋ؛

- جانازا نامازى مەن ۋاعىزدىڭ جالپى ۋاقىتىن 5 مينۋتتان اسىرماۋ؛

- جانازا نامازى بارىسىندا قول الىسىپ امانداسپاۋ؛

- جانازا نامازىنىڭ سابىن تۇزەگەندە كەمىندە ەكى مەتر قاشىقتىقتى ساقتاۋ؛

- قابىر باسىندا ءمايىت جەر قوينىنا تاپسىرىلعاننان كەيىن جاماعاتتى تەزدەتىپ قايتارۋ؛

- جاسى ۇلكەن كىسىلەر، دەنساۋلىعى ناشار ادامداردىڭ (ەر جانە ايەل) جانە جاس بالالاردىڭ جانازا نامازدارىنا قاتىسپاۋى؛

- قوناقاسىن وتكىزبەۋ؛ - جانازادان كەيىنگى استى وتكىزبەۋگە نەمەسە وتباسى مۇشەلەرىمەن شەكتەلۋ. قۇدايى استارعا (جەتىسى، قىرقى، ءجۇزى، جىلى جانە تاعى باسقا) قاتىستى كەلەسى تالاپتار ورىندالۋى قاجەت:

- استاردى وتكىزبەۋ نەمەسە وتباسى مۇشەلەرى مەن جاقىن تۋمالارىمەن شەكتەلۋ؛

- ءبىر عانا ءدىني قىزمەتكەردىڭ قاتىسۋى؛

- سانيتارلىق نورمالاردى (بەتپەردە تاعۋ، مەديتسينالىق قولعاپ كيۋ جانە اراقاشىقتىق) ساقتاۋ. «اللا تاعالا قاسيەتتى قۇراندا: «ءوز- وزدەرىڭدى ءوز قولدارىڭمەن قاۋىپ- قاتەرگە سالماڭدار»، - دەپ ەسكەرتەدى. ءوز ءومىرىمىز بەن دەنساۋلىعىمىز - اللا تاعالانىڭ بىزگە بەرگەن اماناتى. اللا ەلشىسى (وعان اللانىڭ سالاۋاتى مەن سالەمى بولسىن) ءوزىنىڭ ءبىر وسيەتىندە ادام بالاسىنىڭ وزىنە دە، وزگەگە دە زيان كەلتىرۋىنە قاتاڭ تۇردە تىيىم سالعان. شاريعاتتا قاندايدا جۇقپالى اۋرۋدىڭ بەلگىسى تاراعان كەزدە اۋرۋدىڭ ەتەك الۋىن توقتاتۋدا كارانتين قاجەت ەكەنى اتاپ ايتىلعان.

سوندىقتان قازىرگىدەي كوزگە كورىنبەيتىن زياندى دەرت تاراعان كەزدە ونىڭ الدىن الۋ - ءاربىر مۇسىلمان بالاسى ءۇشىن مىندەت»، - دەيدى ق ب د م- دان.

ەسكە سالا كەتسەك، بۇگىن ق ر پرەمەر-ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا 5-شىلدەدەن باستاپ ەلىمىزدە 14 كۇنگە قاتاڭ شەكتەۋ شارالارىن ەنگىزۋ شەشىمى قابىلداندى.