21:09, 02 - شىلدە 2020 | GMT +6
سيمپتومسىز كوروناۆيرۋس: ناۋقاستار نەلىكتەن اۋرۋحاناعا جاتقىزىلمايدى
نۇر-سۇلتان. قازاقپارات - دەنساۋلىق ساقتاۋ ءمينيسترى الەكسەي سوي سيمپتومسىز كوروناۆيرۋسقا شالدىققان ازاماتتارعا اۋرۋحاناعا جاتۋعا نەلىكتەن رۇقسات بەرىلمەيتىنىن ءتۇسىندىردى، دەپ حابارلايدى قازاقپارات ءتىلشىسى.
«كوروناۆيرۋس ينفەكسياسىن بەلگىسى جوق كۇيدە نەمەسە جەڭىل تۇردە كوتەرەتىن ازاماتتار تۇرعىلىقتى جەرى بويىنشا ۋچاسكەلىك تەراپيەۆتىڭ باقىلاۋىندا بولاتىنىن ءتۇسىنۋ كەرەك. ال ينفەكسيالىق جانە پروۆيزورلىق ستاتسيونارلارعا COVID 19 اۋرۋىن ورتاشا اۋىر جانە اۋىر كۇيدە كوتەرىپ جاتقاندار، جرۆي- مەن جانە پنيەۆمونيامەن اۋىرعاندار جاتقىزىلادى»، - دەدى الەكسەي سوي و ك ق-دا وتكەن باسپا ءسوز ءماسليحاتىندا.
ەسكە سالا كەتسەك، بۇعان دەيىن الەكسەي سوي قازاقستاندا كوروناۆيرۋستى جەڭىل جانە سيمپتومسىز كوتەرەتىن ادامدارعا كوشپەلى بريگادالار اقىلى قىزمەت كورسەتەتىنىن حابارلاعان ەدى.