يزرايلدىڭ بەدەلدى گازەتىندە قازاقستان پرەزيدەنتى جانە اباي تۋرالى ماقالالار جاريالاندى
پرەزيدەنت قاسىم- جومارت توقايەۆتىڭ قىزمەتى تۋرالى ايتا كەلە جۋرناليستەر، «قازاقستانداعى ءبىر جىل بۇرىن بولعان بيلىكتىڭ اۋىسۋىن «مەملەكەت ءۇشىن تاريحي ءسات» دەپ اتاپ كورسەتكەن. ولاردىڭ پايىمداۋىنشا، «ق. توقايەۆ ەل قيىن ساتتەردى باسىنان كەشىرىپ جاتقان كۇردەلى كەزەڭدە حالىقتان بيلىككە ماندات الىپ، وتكەن ءبىر جىل ىشىندە قوعاممەن وڭ ديالوگ ورناتىپ جانە «ەستيتىن مەملەكەت» قۇرا وتىرىپ، ءبىرقاتار وزگەرىستەرگە قول جەتكىزە العان».
گازەتتە ەل دامۋىنىڭ وتكىر ماسەلەلەرىن تالقىلايتىن ۇلتتىق قوعامدىق سەنىم كەڭەسىنىڭ جۇمىسى اتالعان. سونداي- اق، جۋرناليستەر ەلدەگى ماڭىزدى رەفورمالار مەن بەيبىت جينالىستار، سايلاۋ جانە ساياسي پارتيالار تۋرالى قابىلدانعان زاڭدارعا سىلتەمە جاساي وتىرىپ، ق. توقايەۆتىڭ زاڭ شىعارۋشىلىق قىزمەتىن دە تىلگە تيەك ەتكەن.
بۇعان قوسا، باسىلىمدا قازاقتىڭ ۇلى اقىنى ابايدىڭ 175 جىلدىعىنا ارنالعان بولەك بەت قاپتالعان. «حاارەتتس» گازەتى ءوز وقىرماندارىنا قازاقستاننىڭ يزرايلدەگى ەلشىلىگىمەن اقىننىڭ «قارا سوزدەرىنىڭ» تۇڭعىش رەت يۆريت تىلىنە اۋدارىلعانى تۋرالى مالىمدەدى. گازەت رەداكتورى يوەل سافريرگە بەرگەن سۇحباتىندا ەلشى ساتىبالدى بۇرشاقوۆ قازاقستاننىڭ ەكونوميكالىق جاعدايى مەن سىرتقى ساياساتى جانە ەكىجاقتى قارىم- قاتىناستاردىڭ قازىرگى جاعدايى مەن دامۋ پەرسپەكتيۆالارى تۋرالى اڭگىمەلەپ بەردى.
س. بۇرشاقوۆ، كورونوۆيرۋس پاندەمياسى كەزەڭىندە قازاقستان مەن يزرايل اراسىندا تىعىز ديالوگ قالىپتاسقانىن حابارلادى. ءساۋىر ايىندا تەلەفون ارقىلى سويلەسكەن كەزدە پرەزيدەنت ق. توقايەۆ پەن پرەزيدەنت ر. ريۆلين COVID-19 جۇقپالى اۋرۋىنىڭ تارالۋىن بولدىرماۋعا قاتىستى پىكىر الماستى. سونىمەن قاتار، ءتۇرلى مەديتسينالىق مەكەمەلەردە قىزمەت اتقاراتىن قازاقستان مەن يزرايل دارىگەرلەرىنىڭ قاتىسۋىمەن بەينەكونفەرەنتسيا فورماتىندا بىرنەشە ماڭىزدى مەديتسينالىق كونسۋلتاتسيالار وتكىزىلدى.
ەلشىنىڭ ايتۋىنشا، بۇگىندە قازاقستاندىق «كۋستو گرۋپپ» حالىقارالىق كورپوراتسياسى كوپتەگەن الەمدىك نارىقتا تانىمال، لاك- بوياۋ جابىندارى مەن قۇرىلىس قوسپالارىن وندىرۋمەن اينالىساتىن يزرايلدىك «تامبۋر» كومپانياسىنىڭ جالعىز يەسى بولىپ تابىلادى. ەلشى گازەت وقىرماندارىن Israir كومپانياسىنىڭ الماتى مەن تەل- اۆيۆ اراسىندا تىكەلەي اۋە قاتىناسىن اشۋعا نيەتتى ەكەنىن حاباردار ەتتى. س. بۇرشاقوۆ يزرايلدىكتەردى قازاقستاننىڭ شارىن كانونى، ىلە الاتاۋ تابيعي قورىعى، التىنەمەل ۇلتتىق پاركى، بۋراباي جانە ت. ب. سول سياقتى تانىمال كورىكتى جەرلەرىنە ساياحات جاساۋعا شاقىردى.
«حاارەتتس» گازەتى ءجۇز جىل بۇرىن قۇرىلعان، ونىڭ كۇندەلىكتى جارىققا شىعاتىن تارالىمى 70 مىڭ دانادان اسادى. تاۋەلسىز زەرتتەۋلەردىڭ ناتيجەسى بويىنشا گازەت ەلدەگى «ەڭ ىقپالدى ب ا ق باسپاسى» بولىپ سانالادى. «حاارەتتس» يۆريت جانە اعىلشىن تىلدەرىندە شىعارىلادى.