كوروناۆيرۋس پاندەمياسى قازاقستانداعى ەڭبەك نارىعىنا قالاي اسەر ەتتى؟

نۇر-سۇلتان. قازاقپارات - كوروناۆيرۋس پاندەمياسىنىڭ اسەرىنەن ەڭ الدىمەن داياشىلار، جۇك تيەۋشىلەر، تازالاۋشىلار، ساتۋشىلار، اس ءۇي جۇمىسشىلارى جانە باسقا دا تۇراقسىز جۇمىس ىستەيتىن قىزمەتكەرلەر زارداپ شەگۋى مۇمكىن.

بۇل جونىندە ەڭبەك رەسۋرستارىنا دامىتۋ ورتالىعىنا سىلتەمە جاساپ قازاقپارات حابارلايدى.

COVID-19 پاندەمياسى جۇمىسپەن قامتۋ سالاسىنداعى بەلسەندىلىكتى ايتارلىقتاي السىرەتىپ، قازاقستاننىڭ ەڭبەك نارىعىندا ءوز تۇزەتۋلەرىن ەنگىزدى. وسىعان بايلانىستى، WDC (ەڭبەك رەسۋرستارىن دامىتۋ ورتالىعى) ەلدەگى جۇمىسپەن قامتۋعا پاندەميانىڭ اسەرىن زەرتتەۋگە ارنالعان «COVID-19 پاندەمياسى اياسىندا قازاقستان رەسپۋبليكاسىنىڭ ەڭبەك نارىعى» اتتى كەزەكتى تالدامالىق شولۋىن دايىندادى.

سونىڭ ناتيجەسىندە ورتالىق ساراپشىلارى ءبىرقاتار ماڭىزدى تۇجىرىمدارعا كەلدى. ماسەلەن، وتكەن جىلدىڭ وسى كەزەڭىمەن سالىستىرعاندا ەلەكتروندىق ەڭبەك بيرجاسىندا (ە ە ب) Enbek.kz تۇيىندەمەلەر مەن بوس ورىندار سانى توتەنشە جاعداي سالدارىنان 35 پايىزدان 23 پايىزعا تومەندەدى.

الايدا مامىر ايىندا توتەنشە جاعداي رەجيمى مەن قاتاڭ كارانتين توقتاتىلعان كەزدە تۇيىندەمە سانى دا، بوس ورىندار سانى دا بەلسەندى قالپىنا كەلە باستادى. وسىلايشا، ە ە ب تۇيىندەمەلەر مەن بوس ورىندار سانى مامىر ايىندا ءساۋىر ايىمەن سالىستىرعاندا 1,6 جانە 3,5 ەسە ءوستى.

بۇگىندە قۇرىلىس سالاسى «جاڭا بوس جۇمىس ورىندارى» ءجيى اشىلاتىن باستى سالاعا اينالدى. وسىلايشا، ە ە ب- دا قۇرىلىس سالاسىنداعى بوس ورىنداردىڭ ۇلەسى قاڭتار-مامىر ارالىعىندا 8 پايىزدان 43 پايىزعا دەيىن ءوستى. مۇنداي ءۇردىس ماۋسىمدىق جۇمىستاردىڭ جاندانۋىمەن، سونداي-اق داعدارىسقا قارسى مەملەكەتتىك شارالار جيىنتىعىن، ونىڭ ىشىندە «جۇمىسپەن قامتۋدىڭ جول كارتاسىن» ىسكە اسىرۋمەن بايلانىستى بولۋى مۇمكىن.

ءوز كەزەگىندە، وڭىرلەر بولىنىسىندە ت ج- دان كەيىن (مامىر ايىندا) ەڭ كوپ بوس ورىندارى - الماتىدا، نۇر-سۇلتان مەن قوستانايدا ( مامىر ايىندا قۇرىلعان بارلىق ب وس ورىندار سانىنىڭ 29 پايىزى ) قۇرىلدى.

ال 2020-جىلدىڭ 5-ايىندا ەڭ كوپ تۇيىندەمەلەر تۇركىستان، جامبىل جانە الماتى وبلىستارىنا تيەسىلى (2020-جىلدىڭ قاڭتار-مامىر ايلارىندا ۇسىنىلعان تۇيىندەمەلەر سانىنىڭ 31 پايىزى).

ايتا كەتسەك، اتالمىش ءۇش وڭتۇستىك ءوڭىر 2020-جىلدىڭ قاڭتار-مامىر ايلارىندا حالىقتى جۇمىسپەن قامتۋ ورتالىقتارىندا تىركەلگەندەر سانى - 102 مىڭ ادام نەمەسە جۇمىس ىزدەپ جۇرگەن ادامداردىڭ جالپى سانىنىڭ 32 پايىزى بويىنشا كوشباسشىلار قاتارىندا.

جالپى، WDC باعالاۋى بويىنشا قازاقستاندا تەحنيكالىق جۇمىسسىزدار سانى ساۋىردە 4,2 ميلليون ادامنان مامىردا 1,1 ميلليون ادامعا جانە ماۋسىمدا 735 مىڭ ادامعا دەيىن تومەندەدى. بۇل رەتتە كاسىبي توپتار بولىنىسىندە كوبىنە كوروناۆيرۋس پاندەمياسىنىڭ اسەرىنەن داياشىلار، جۇك تيەۋشىلەر، تازالاۋشىلار، ساتۋشىلار، اس ءۇي قىزمەتكەرلەرى جانە باسقا بىلىكتىلىگى تومەن جانە تۇراقسىز جۇمىس ىستەيتىن قىزمەتكەرلەر زارداپ شەگۋى مۇمكىن.

سالالار بولىنىسىندە COVID-19 پاندەمياسى سوڭعى جىلدارى ەكونوميكادا ماڭىزى ارتقان «قىزمەت كورسەتۋ» سالاسىنا ەڭ اۋىر سوققى جاسادى. سونىمەن قاتار، WDC تالداۋشىلارى ۇلتتىق ەكونوميكا مينيسترلىگى ستاتيستيكا كوميتەتىنىڭ رەسمي دەرەكتەرىنە سايكەس اعىمداعى جىلدىڭ ءبىرىنشى توقسانىنداعى جاعداي بويىنشا، ياعني پاندەميا باستالعانعا دەيىن قازاقستانداعى جۇمىسسىزدار سانى 442 مىڭ ادامدى قۇراعانىن ەسكە سالادى.

«COVID-19 پاندەمياسى اياسىندا قازاقستان رەسپۋبليكاسىنىڭ ەڭبەك نارىعى» اتتى WDC تالدامالىق شولۋىنىڭ تولىق نۇسقاسىن مىنا سىلتەمەدەن كورە الاسىزدار.