كوروناۆيرۋستان ەمدەلۋگە قويدىڭ مايى كومەكتەسە مە؟ دارىگەر جاۋابى

نۇر -سۇلتان. قازاقپارات - الماتى قالالىق №9-ەمحانانىڭ مەڭگەرۋشىسى مادينا وماروۆا قويدىڭ مايى كوروناۆيرۋسقا قالاي اسەر ەتەتىنى تۋرالى ايتىپ بەردى، - دەپ حابارلايدى اكىمدىكتىڭ StopCov Almaty تەلەگرام- كانالىندا.

دارىگەر وماروۆانىڭ ايتۋىنشا، حاتتاما بويىنشا، مەديتسينالىق قىزمەتكەرلەردىڭ قابىنۋعا قارسى ماي قولدانۋعا قۇقىعى جوق. سونداي-اق، مامان كەزىندە قويدىڭ مايى بارلىعىنا ەم بولعانىن، ءبىراق قازىر ونىڭ ورنىنا باسقا مايلاردىڭ قولدانىلىپ جاتقانىن ايتىپ ءوتتى.

«قويدىڭ مايى - بۇل حالىق ەمى، ءبىزدىڭ اتا-بابالارىمىز قولدانعان، ال قازىر مۇنداي دامىعان زاماندا قابىنۋعا قارسى ءتۇرلى كرەمدەر مەن مايلار بار. حاتتاما بويىنشا بىزدە مايلاردى قولدانۋعا كەڭەس بەرىلمەيدى»، - دەدى ول.

ەسكە سالايىق، بۇگىندە قازاقستاندا كوروناۆيرۋس جۇقتىرعانداردىڭ سانى 41065 كە جەتتى. 188 ادام قايتىس بولىپ، 13614 ادام ايىقتى.