قازاقستان پرەزيدەنتى ۇلتتىق بانكتىڭ ەسەبىن تىڭدادى

نۇر-سۇلتان. قازاقپارات - مەملەكەت باسشىسىنا ۇلتتىق بانك ءتوراعاسى ەربولات دوسايەۆ جانە باسقارما مۇشەلەرى ەكىنشى دەڭگەيدەگى بانكتەر اكتيۆتەرىنىڭ ساپاسىن باعالاۋ بويىنشا وتكەن جىلعى قارجى-نەسيە ساياساتىنا قاتىستى جۇرگىزىلگەن جۇمىستاردىڭ قورىتىندىلارى، ۇلتتىق بانكتىڭ التىن- ۆاليۋتا رەزەرۆىنىڭ احۋالى جانە ۇلتتىق قوردىڭ اكتيۆتەرى جونىندە ەسەپ بەردى، دەپ حابارلايدى اقوردا.

قاسىم-جومارت توقايەۆقا ۇلتتىق بانكتىڭ داعدارىسقا قارسى باستامالارى، 2020 -جىلدىڭ ەكىنشى جارتىجىلدىعىنا ارنالعان جوسپارى جانە كوروناۆيرۋس پاندەمياسى كەزىندەگى قارجى تۇراقتىلىعىن قامتاماسىز ەتۋ ءۇشىن قابىلداعان شارالارى تۋرالى باياندالدى.

قازاقستان پرەزيدەنتى ءوز سوزىندە قازىرگى جاعدايدا اقشا- نەسيە ساياساتىن ءتيىمدى ىسكە اسىرۋدىڭ ماڭىزدىلىعىن اتاپ ءوتىپ، 2030 -جىلعا دەيىنگى اقشا- نەسيە ساياساتىن ىسكە اسىرۋ ستراتەگياسىن ازىرلەۋ بارىسىندا حالىقارالىق نارىقتاعى ىرگەلى ۇردىستەردى ەسكەرۋ قاجەتتىگىن ايتتى. جاڭا ستراتەگيا ەلىمىزدەگى ماكروەكونوميكالىق تۇراقتىلىقتى قامتاماسىز ەتىپ، قارجى جۇيەسىنىڭ ورنىقتى دامۋىنا تىڭ سەرپىن بەرۋى كەرەك.

مەملەكەت باسشىسى ۇلتتىق بانككە، قارجى نارىعىن رەتتەۋ جانە دامىتۋ اگەنتتىگىنە AQR قورىتىندىسى بويىنشا جول كارتاسىن جۇزەگە اسىرۋدى جالعاستىرۋدى، وتاندىق بانك سەكتورىنىڭ ساپاسىنا بەلگىلەنگەن مەرزىم بويىنشا باعالاۋ جۇرگىزۋدى تاپسىردى. پرەزيدەنت ايىرباس باعامىنىڭ تۇراقتىلىعىن قامتاماسىز ەتۋدى ماڭىزدى ماسەلە رەتىندە اتاپ ءوتتى.

- بۇل ماسەلەدە ۇكىمەت پەن ۇلتتىق بانك ۇيلەسىمدى جۇمىس ىستەۋى قاجەت ەكەنىن اتاپ ايتقىم كەلەدى. كۆازيمەملەكەتتىك كومپانيالارداعى باسى ارتىق ۆاليۋتانى ىشكى نارىققا ساتۋ تاجىريبەسىن جالعاستىرا بەرۋ كەرەك. ۇلتتىق بانك قاجەت بولعان جاعدايدا ايىرباس باعامىن تۇراقتاندىرۋ ءۇشىن قوسىمشا شارالار قابىلدايدى، - دەدى قاسىم-جومارت توقايەۆ.

سونىمەن قاتار ۇلتتىق بانككە قارجى نارىعىن رەتتەۋ جانە دامىتۋ اگەنتتىگىمەن بىرلەسىپ، كەپىلسىز تۇتىنۋ نەسيەسىنە قاتىستى ماسەلەنى ۇدايى باقىلاۋدا ۇستاۋ جونىندە تاپسىرما بەرىلدى. مەملەكەت باسشىسى قارجى ۇيىمدارىنىڭ جۇمىسىن اشىق جۇرگىزۋدى ماڭىزدى مىندەت دەپ سانايدى. بۇل ماسەلە جالعان لومباردتار مەن ميكروقارجىلىق ۇيىمداردىڭ الاياقتىق ءىس-ارەكەتتەرى ۇدەي تۇسۋىنە بايلانىستى وتە وزەكتى بولىپ وتىر.

- لومباردتار مەن باسقا دا قارجى ۇيىمدارىنىڭ جۇمىسىنا تەكسەرۋ جۇرگىزىپ، اتالعان سالاداعى جاعداي تۋرالى اقپارات بەرۋدى تاپسىردىم. بۇل جۇمىستى جىلدامداتۋ كەرەك. تەكسەرۋلەردىڭ قورىتىندىسى نەگىزىندە قارجى نارىعىن رەتتەۋ جانە دامىتۋ اگەنتتىگىنە باس پروكۋراتۋرامەن بىرلەسىپ، اتالعان سالانى رەتتەۋ جۇمىستارىن جۇيەلى تۇردە جۇرگىزۋ جانە تۇتىنۋشىلاردىڭ قۇقىعىن قورعاۋ جونىندە ۇسىنىس ەنگىزۋدى تاپسىرامىن، - دەدى پرەزيدەنت.

پاندەميا كەزىندەگى الەمدىك ۇردىستەر مەن ەلىمىزدەگى جاعداي قارجى سالاسىنا زاماناۋي تەحنولوگيالاردى ەنگىزۋ قاجەتتىگىن كورسەتتى. وسىعان وراي قاسىم-جومارت توقايەۆ ۇلتتىق بانككە ۇكىمەتپەن جانە «استانا» حالىقارالىق قارجى ورتالىعىمەن بىرلەسىپ، 2025 -جىلعا دەيىنگى قارجى تەحنولوگياسى مەن يننوۆاتسياسىن دامىتۋدىڭ تۇجىرىمداماسىن بەكىتۋدى تاپسىردى. سونىمەن قاتار ەكونوميكا مەن بيزنەسكە بەلسەندى نەسيەلەۋ بويىنشا قولداۋ كورسەتۋ - ۇلتتىق بانكتىڭ ماڭىزدى مىندەتى.

- سوڭعى ءۇش جىلدا ەكونوميكانى نەسيەلەۋدىڭ ءوسىمى اسا بايقالمادى. بانكتەر جۇمىس بارىسىندا بارىنشا قولايلى جانە ءتيىمدى جاعداي ۇسىنا وتىرىپ، ءاربىر كليەنت ءۇشىن بەلسەندى كۇرەسپەيدى. سونىمەن قاتار قازىرگى جاعدايدا بيزنەسكە قارجى رەسۋرسى قاجەت جانە ونى جىلدام الۋى كەرەك. سوندىقتان قارجى نارىعىن رەتتەۋ جانە دامىتۋ اگەنتتىگى ۇلتتىق بانكپەن بىرلەسىپ، ەكونوميكانى، شاعىن جانە ورتا بيزنەستى نەسيەلەۋدى ارتتىرۋ بويىنشا ناقتى شارالار قابىلداۋى قاجەت، - دەدى پرەزيدەنت.

جيىن سوڭىندا مەملەكەت باسشىسى ۇلتتىق بانكتىڭ جاڭا قونىسىنداعى جۇمىسىنا تابىس تىلەدى. پرەزيدەنت ۇلتتىق بانكتىڭ كوشىپ كەلۋى ەلورداداعى قارجى سەكتورىن كۇشەيتىپ، ۇكىمەتپەن جانە «استانا» حالىقارالىق قارجى ورتالىعىمەن اراداعى جۇمىسىنىڭ ۇيلەسىمدىلىگىن ارتتىراتىنا سەنىم ءبىلدىردى.