13:45, 01 - شىلدە 2020 | GMT +6
پ ت ر-تەست قۇنى ساتىپ اكەلىنگەن باعاسىنان نەگە قىمبات - مينيسترلىك جاۋاپ بەردى
نۇر-سۇلتان. قازاقپارات - دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا پ ت ر- تەستەن ءوتۋ قۇنى - تەستىڭ ءوزىنىڭ ساتىپ اكەلىنگەن باعاسىنان نەلىكتەن قىمبات ەكەنىن ءتۇسىندىردى، دەپ حابارلايدى قازاقپارات ءتىلشىسى.
«بۇل جەردە تولەم پ ت ر- تەست ءۇشىن عانا جاسالمايدى. پ ت ر-تەستىلەۋ قىزمەتى ءۇشىن دە اقى الىنادى. ول تولەمگە تەستىڭ ءوزى عانا ەمەس، بۇل قىزمەتتى جۇرگىزۋگە قاجەتتى ماتەريالدار شىعىنى دا كىرەدى. ياعني وندا 40 قا تارتا زەرتحانالىق بۇيىم بار: ماتەريالدارعا ارنالعان زونتتار، كولىكتىك ورتا تۇتىگى جانە تاعى باسقالار»، - دەدى ليۋدميلا بيۋرابەكوۆا.
ۆيتسە-ءمينيستردىڭ ايتۋىنشا، بۇل قىزمەت قۇنىنا مەديتسينالىق قىزمەتكەرلەردىڭ قورعانىس قۇرالدارى مەن ايلىعى دا كىرەدى.
ەسكە سالا كەتسەك، ليۋدميلا بيۋرابەكوۆا بۇعان دەيىن قازاقستاندا كوروناۆيرۋس ينفەكسياسىن جۇقتىرعان ادامداردى ەمدەۋ حاتتاماسىنا جاڭا سحەما ەنگىزىلگەنىن ءمالىم ەتكەن ەدى.
ونىڭ ايتۋىنشا قازاقستاندىق دارىگەرلەر اناسىنان كوروناۆيرۋس جۇقتىرىپ تۋعان 21 ءسابيدى ەمدەپ شىعارعان.
اۆتور: ايان بەكەن ۇلى