ەنەرگياعا تاريفتىڭ قىمباتتاۋىنان تاۋاردىڭ باعاسى ارتادى - ساراپشى
مۇنداي پىكىردى «سامۇرىق- ەنەرگو» ا ق باسقارما مۇشەسى - قارجى جونىندەگى باسقارۋشى ديرەكتورى ايدار رىسقۇلوۆ ءبىلدىردى، دەپ حابارلايدى قازاقپارات ءتىلشىسى.
ونىڭ اتاپ وتۋىنشە، ەلەكتر ەنەرگياسىنا تاريفتىڭ ارتۋىنا نەگىزگى سەبەپ - ەنەرگيانى ءوندىرۋدىڭ وزىندىك قۇنىنىڭ وسى كۇنگە دەيىن بەكىتىلگەن شەكتى تاريفتەن تومەن بولىپ كەلۋى. قازىرگى ۋاقىتتا ەنەرگيانىڭ وزىندىك قۇنى 9 تەڭگە بولسا، تاريف 7,7 تەڭگە مولشەرىندە بەكىتىلگەن. مۇنداي جايتتىڭ ورىن الۋىنا ەلەكتر ەنەرگياسىن تۇتىنۋ كولەمىنىڭ جىلدان- جىلعا ارتۋى، سوعان وراي مازۋت پەن كومىر تاسىمالى قۇنىنىڭ قىمباتتاۋى سەبەپ بولىپ وتىر.
«تاريفتىڭ ارتۋى بارلىق ستانسالاردىڭ جۇمىس جاعدايىنا سەپتىگىن تيگىزەدى. ستانسالاردىڭ توزا باستاۋى ۇنەمى ينۆەستيتسيا سالۋدى قاجەت ەتەدى. وسى رەتتە تاريفتىڭ كوتەرىلۋى بارلىق ستانسالاردىڭ جۇمىس ىستەپ تۇرۋىنا سەپتىگىن تيگىزەدى. بۇل شارالار ەنەرگيالىق قاۋىپسىزدىكتى ساقتاۋعا، ستانسالاردىڭ جوسپاردان تىس جوندەۋ جۇمىستارىنا توقتاپ قالماۋىنا سەپتىگىن تيگىزەدى. سوندىقتان تاريفتى كوتەرۋدەن جالتارا المايمىز. تولىقتاي ايتسا، بۇل - قازاقستاننىڭ ەنەرگەتيكالىق قاۋىپسىزدىگى ماسەلەسى»، - دەدى ايدار رىسقۇلوۆ.
سونىمەن قاتار ول ەلەكتر ەنەرگياسى باعاسىنىڭ كوتەرىلۋى ءدال وسى قىزمەت ءتۇرىن تۇتىناتىن كاسىپورىندار شىعاراتىن سوڭعى ءونىم باعاسىنا دا اسەر ەتۋى مۇمكىن ەكەندىگىن جوققا شىعارمادى.
«قازاقستاندا ەلەكتر ەنەرگياسىن تۇتىنۋ وزگە دە سوڭعى ونىمدەردىڭ وزىندىك قۇنىنىڭ ارتۋىنا الىپ كەلەدى. ويتكەنى، ەلەكتر ەنەرگياسىنسىز قانداي دا ءبىر ءونىم شىعارۋ مۇمكىن ەمەس. ەلەكتر ەنەرگياسىنىڭ قۇنى ناقتى ءونىمنىڭ وزىندىك قۇنىنا دا تىكەلەي اسەر ەتەدى. ءبىر جاعىنان الىپ قاراعاندا، ءتاريفتىڭ قىمباتتاۋى ەنەرگيانى ۇنەمدەۋگە دە سەپتىگىن تيگىزەدى دەپ سانايمىز. ياعني، ادامدار ەلەكتر ەنەرگياسىن ۇنەمدەۋگە داعدىلانادى»، - دەدى ول.
بۇعان دەين حابارلاعانىمىزداي، 1 - شىلدەدەن باستاپ قازاقستاندا ەلەكتر ەنەرگياسى قىمباتتايدى.
اۆتور: مارلان جيەمباي