گونكونگتىڭ ۇلتتىق قاۋىپسىزدىگى تۋرالى زاڭ قابىلداندى

نۇر- سۇلتان. قازاقپارات - قىتاي پارلامەنتى گونكونگتىڭ ۇلتتىق قاۋىپسىزدىگى تۋرالى زاڭ قابىلدادى، دەپ حابارلايدى حابار 24.

South China Morning Post باسىلىمىنىڭ دەرەگىنشە، جالپى قىتايلىق حالىق وكىلدەرى جيىنىنىڭ تۇراقتى كوميتەتىنىڭ 162 مۇشەسى زاڭ جوباسىن قولداپ، داۋىس بەرگەن.

قۇجاتقا سايكەس سەپاراتيستىك، تەرروريستىك جانە ارانداتۋشىلىق ارەكەتتەرگە بارۋعا جانە شەتەلدىك كۇشتەرمەن بايلانىستا بولۋعا تىيىم سالىنادى.

باسىلىمنىڭ حابارلاۋىنشا، زاڭدى بۇزعاندار ءومىر بويى باس بوستاندىعىنان ايىرىلۋى مۇمكىن. قۇجات ءماتىنى بۇگىن جاريالانىپ، 1- شىلدەدە كۇشىنە ەنەدى دەپ جوسپارلانعان. قىتاي بيلىگى ارنايى اكىمشىلىك ايماققا قاتىستى جاڭا زاڭ جوباسىن وتكەن ايدا تالقىلاي باستادى. بۇل باستاماعا گونكونگ تۇرعىندارى نارازىلىق تانىتىپ، شەرۋلەرگە شىققان بولاتىن.