شىمكەنت قالاسى اكىمىنىڭ ءتورت ورىنباسارى ناۋقاستانىپ قالدى

شىمكەنت. قازاقپارات - شىمكەنت قالاسىنىڭ اكىمى مۇرات ايتەنوۆتىڭ ءتورت ورىنباسارى ناۋقاستانىپ قالدى. قالا اكىمدىگىنىڭ باسپا ءسوز قىزمەتى ولاردىڭ ەكەۋى پنيەۆمونياعا شالدىققانىن راستادى، دەپ حابارلايدى قازاقپارات ءتىلشىسى.

ءمالىم ەتىلگەندەي، پنيەۆمونياعا شالدىققان قالا اكىمىنىڭ ءبىرىنشى ورىنباسارى ەربول سادىر مەن ورىنباسار الماسبەك مامىتبەكوۆ اۋرۋحانادا ەمدەلىپ جاتىر. تاعى ەكى ورىنباسارى ماقسۇت يساقوۆ پەن نۇرسادىق ەرگەشبەك تە سۋىقتاپ قالعانى بەلگىلى بولدى.

«قازىر قالا اكىمىنىڭ ءبىر ورىنباسارى باۋىرجان مامىتاليەۆ - قىزمەت بابىندا. قالا اكىمى مۇرات ايتەنوۆتىڭ ءوزى بىرەر كۇن بۇرىن عانا قالىپتى جۇمىس تارتىبىنە ورالدى. ول بۇعان دەيىن وقشاۋلانىپ، قاشىقتان جۇمىس ىستەگەن بولاتىن»، - دەلىنگەن حابارلامادا.

ايتا كەتەيىك، ەلىمىزدىڭ بۇرىنعى دەنساۋلىق ساقتاۋ ءمينيسترى ەلجان ءبىرتانوۆتان كوروناۆيرۋس انىقتالعان سوڭ، شىمكەنت قالاسىنىڭ اكىمى دە مەديتسينالىق تەكسەرۋدەن وتكەن. م. ايتەنوۆتەن قاۋىپتى ىندەتتىڭ بەلگىلەرى انىقتالمادى.

اۆتور: اينۇر اقبايەۆا