ءىز-ءتۇزسىز جوعالعان اقمولالىق نۇر-سۇلتانداعى اۋرۋحانادان تابىلدى
ۆەدومستۆونىڭ مالىمەتىنشە، ەرەيمەنتاۋ اۋداندىق پ ب-نە جەرگىلىكتى تۇرعىن، 40 جاستاعى ايەلدىڭ تۋىستارى حابارلاسىپ كومەك سۇراعان. تۋىستارىنىڭ سوزىنشە، ايەل ماۋسىمنىڭ 15 ىندە ۇيىنەن شىعىپ كەتىپ، قايتىپ ورالماعان.
«جەدەل-ىزدەستىرۋ كەزىندە ءتارتىپ ساقشىلارى ءىز-ءتۇزسىز جوعالعان ايەلدىڭ ەلورداعى مەديتسينالىق مەكەمەلەردىڭ بىرىندە بولعانىن انىقتادى»، - دەيدى ۆەدومستۆودان.
سونىمەن قاتار، پوليتسيا قىزمەتكەرلەرى 12-ماۋسىم كۇنى جوعالعان ستەپنوگور قالاسىنىڭ تۇرعىنى 27 جاستاعى ايەلدىڭ جۇرگەن جەرىن انىقتادى. ايەل ۇيىنەن كەتكەننەن بەرى جاقىندارىمەن بايلانىسقا شىقپاعان.
«انىقتالعانداي، ايەل قاراعاندى قالاسىندا بولعان، وعان قاتىستى قىلمىس نەمەسە قانداي دا ءبىر قۇقىق بۇزۋشىلىق جاسالعان جوق. ونىمەن پروفيلاكتيكالىق اڭگىمە وتكىزىلدى»، - دەپ تولىقتىردى ۆەدومستۆودان.
وسىعان بايلانىستى ءتارتىپ ساقشىلارى ءوڭىر تۇرعىندارىنا ۇزاق ۋاقىتقا باسقا جاققا كەتكەن كەزدە جاقىندارىنا ەسكەرتۋدى سۇرايدى.
اۆتور: اسلان وسپانوۆ