الماتىنىڭ جابىلاتىنى تۋرالى تاراعان اقپارات جالعان - اكىمدىك
بۇل تۋرالى قالا اكىمدىگى جانىنان قۇرىلعان كوروناۆيرۋستىڭ تارالۋىن بولدىرماۋ جونىندەگى كوميسسيا ءمالىم ەتتى، دەپ حابارلايدى قازاقپارات ءتىلشىسى.
الەۋمەتتىك جەلىلەر مەن مەسسەندجەرلەردە اعىمداعى جىلدىڭ 30-ماۋسىمى ساعات 00:00-دەن باستاپ بەلگىلەنبەگەن مەرزىمگە دەيىن قوسىمشا شەكتەۋ شارالارىن ەنگىزۋ، ونىڭ ىشىندە ءىرى ساۋدا نىساندارىنىڭ جانە جاياۋ جۇرگىنشىلەر ايماقتارىنىڭ، ساياباقتاردىڭ، سكۆەرلەردىڭ، قالاعا كىرىپ-شىعاتىن جولداردىڭ جابىلاتىنى تۋرالى اقپارات تارادى. وسىعان بايلانىستى الماتى قالاسىنىڭ اكىمدىگى جانىنان قۇرىلعان كوروناۆيرۋستىڭ تارالۋىن بولدىرماۋ جونىندەگى كوميسسيا اتالعان اقپاراتتىڭ شىندىققا سايكەس كەلمەيتىنىن رەسمي تۇردە ءمالىم ەتتى.
«الماتىداعى كوروناۆيرۋستىڭ تارالۋىن بولدىرماۋ جونىندەگى كوميسسيا قالانىڭ رەسمي دەرەك كوزدەرىندە جاريالانعان اقپاراتتى عانا قولدانۋعا شاقىرادى. سونىمەن بىرگە، جالعان اقپاراتتى تاراتقانى ءۇشىن جاۋاپكەرشىلىككە تارتىلاتىنىن ەسكە سالامىز»، - دەلىنگەن حابارلامادا.
اۆتور: الما مۇقانوۆا