ەلىمىزدە كولەڭكەلى ەكونوميكانى ازايتۋ ءۇشىن قانداي شارالار جاسالدى؟

نۇر-سۇلتان. قازاقپارات - ق ر قارجى ءمينيسترىنىڭ مىندەتىن اتقارۋشى بەرىك شولپانقۇلوۆ كولەڭكەلى ەكونوميكانى ازايتۋ ءۇشىن ەنگىزىلگەن قۇرالدار تۋرالى ايتىپ بەردى، دەپ حابارلايدى قازاقپارات ءتىلشىسى.

«2019-جىلى 1- قاڭتاردان باستاپ بارلىق قوسىلعان قۇن سالىعىن تولەۋشىلەر «ەلەكتروندىق شوت-فاكتۋرالار» مىندەتتى كوشىرمەسىنە اۋىستىرىلدى جانە بۇگىندە 440 مىڭنان استام پايدالانۋشى تىركەلىپ، 433 ميلليون ەلەكتروندىق شوت-فاكتۋرا جازعان. «ەلەكتروندىق شوت- فاكتۋرالار» اقپاراتتىق جۇيەسىن پايدالانۋشىلاردان قوسىمشا 290,2 ميلليارد تەڭگە ءتۇستى. ءبىزدىڭ بولجاۋىمىزشا 2020-جىلى شامامەن قوسىمشا 140 ميلليارد تەڭگە ءتۇسىم كۇتىلۋدە»، - دەدى سپيكەر ۇكىمەتتىڭ بۇگىنگى وتىرىسىندا.

سونىمەن بىرگە، سپيكەر وتكەن جىلى تاۋارلاردى تاڭبالاۋ جۇيەسىنىڭ دە سىناقتان وتكەنىن ەسكە سالدى. تەرى بۇيىمدارىن تاڭبالاۋ ناتيجەسىندە 2019-جىلعى كىرىستەر 2 ەسەگە ارتقان جانە 2020 -جىلى 1 ميلليارد تەڭگەگە دەيىن ءتۇسىم كۇتىلۋدە. بۇدان باسقا، تاڭبالاۋ بويىنشا تەمەكى ونىمدەرى، الكوگول ونىمدەرى، اياق كيىم تاۋارلارى، دارىلىك زاتتار جانە ءسۇت ونىمدەرى سياقتى تاۋارلار تىزبەسىن كەڭەيتۋ بولجانىپ وتىر.

«بيىلدان باستاپ ونلاين باقىلاۋ- كاسسا ماشينالارى مىندەتتى تۇردە قولدانىلۋى ءتيىس. بۇگىنگى تاڭدا باقىلاۋ- كاسسا ماشينالارىن پايدالانۋشىلاردىڭ جالپى سانى 728 مىڭعا جەتتى، ونىڭ 710 مىڭى نەمەسە %97,5 ونلاين باقىلاۋ- كاسسا ماشينالارىنا كوشتى. سونىمەن بىرگە، قولدانىستاعى اقپاراتتىق جۇيەلەر بازاسىندا تاۋارلاردى قاداعالاۋدىڭ ۇلتتىق جۇيەسى قۇرىلۋدا. بيىلعى قازان ايىنان باستاپ اقپاراتتىق جۇيەدە تاۋارلارعا ەلەكتروندىق ىلەسپە جۇك قۇجاتتارى ەنگىزىلەدى. جالپى العاندا، جۇيە تاۋاردىڭ بولشەك ساۋداسىنا دەيىنگى جىلجۋىنىڭ بارلىق تىزبەگىن قاداعالاۋعا مۇمكىندىك بەرەدى. جۇيەدەن كەيىن جالعان شوت- فاكتۋرالاردىڭ كوشىرمەسىن توقتاتامىز»، - دەپ اتاپ ءوتتى ب. شولپانقۇلوۆ.

ودان بولەك، سالىقتىق اكىمشىلەندىرۋ ماقساتىندا ءۇشىنشى تۇلعالاردىڭ دەرەكتەر بازاسى قۇرىلعان.

2019-جىلى بيۋجەتكە قوسىمشا 18,6 ميلليارد تەڭگە سوماسىندا سالىق تۇسكەن. تاعى ءبىر ءتيىمدى قۇرالداردىڭ ءبىرى - قۇرىلىس سالاسىنداعى مەملەكەتتىك ساتىپ الۋدى قازىناشىلىق سۇيەمەلدەۋ. وسىلايشا، سالىق جۇكتەمەسىنىڭ كوەففيتسيەنتى مەملەكەتتىك ساتىپ الۋعا قاتىسۋشىلاردا 2,3 ەسەگە ءوسىپ، قوسىمشا 54,4 ميلليارد تەڭگە تۇسكەن.

«سيفرلاندىرۋ جانە كامەرالىق باقىلاۋعا كوشۋ ارقىلى دا سالىقتىق تەكسەرۋلەر وزگەرتىلدى. ناتيجەسىندە ولاردىڭ سانى %29 كە ازايدى. بۇل رەتتە زاڭبۇزۋشىلىقتاردىڭ انىقتالۋى 2 ەسەگە ارتتى نەمەسە 344 ميلليارد تەڭگە ەسەپكە ءتۇستى. مينيسترلىكتىڭ نەگىزگى باعىتتارىنىڭ ءبىرى - اينالى كەدەندىك ستاتيستيكا بويىنشا الشاقتىقتى تومەندەتۋ. بۇگىنگى تاڭدا قازاقستان مەن قىتاي اراسىندا ونلاين رەجيمىندە كەدەندىك دەكلاراتسيالارمەن ەلەكتروندىق الماسۋ جۇرۋدە. بۇل قازاقستاننىڭ قىتايدان يمپورتى بويىنشا الشاقتىقتى 2017-جىلى %60- تەن 2019-جىلى %48 كە دەيىن قىسقارتۋعا مۇمكىندىك بەردى. 5 ايدىڭ قورىتىندىسى بويىنشا ايىرماشىلىق %39 كە دەيىن تومەندەدى. وسىلايشا، وتكەن جىلى بيۋجەتكە قوسىمشا 236 ميلليارد تەڭگە ءتۇستى»، - دەدى سپيكەر.

2018-جىلدىڭ اياعىندا «تاۋەكەلدى باسقارۋ» اقپاراتتىق جۇيەسى ىسكە قوسىلعان. ونىڭ قورىتىندىسى بويىنشا 2019 -جىلى بيۋجەتكە 85 ميلليارد تەڭگە، 2020-جىلدىڭ باسىنان بەرى - 34,9 ميلليارد تەڭگە ءتۇستى. ەۋرازيالىق ەكونوميكالىق وداق ەلدەرىنەن يمپورتقا سالىقتىق اكىمشىلىك كۇشەيتىلدى جانە «ەكسپورتتىق باقىلاۋ» ءمودۋلى تاجىريبەلىك پايدالانۋعا بەرىلدى.

ناتيجەسىندە قوسىمشا قوسىلعان قۇن سالىعى بويىنشا 122 ميلليارد تەڭگە ءتۇستى.

«جالپى 2018-جىلمەن سالىستىرعاندا تاۋارلاردى قاتە دەكلاراتسيالاۋ فاكتىلەرىن انىقتاۋ 5,5 ەسەگە ارتقان. كەدەندىك تولەمدەر مەن سالىقتار 2,3 ميلليارد تەڭگەگە وسكەن»، - دەدى بەرىك شولپانقۇلوۆ.