شىمكەنتتە سپورت كەشەنىندە اشىلعان پروۆيزورلى ورتالىققا دارىگەرلەر كەرەك

شىمكەنت. قازاقپارات - شىمكەنتتىڭ جەڭىل اتلەتيكا سپورت كەشەنىندە اشىلعان پروۆيزورلى ورتالىققا مەديتسينا ماماندارى كەرەك بولىپ جاتىر.

بۇل تۋرالى قالالىق اكىمدىكتىڭ باسپا ءسوز قىزمەتى حابارلادى.

شىمكەنت قالاسىنىڭ اكىمى مۇرات ايتەنوۆتىڭ تاپسىرماسىنا سايكەس، سپورت كەشەنىنەن قوسىمشا اشىلعان كۇندىزگى ستاتسيونار 450 ورىنعا دايىندالۋدا. ورتالىقتا جرۆي جانە پنيەۆمونيا جۇقتىرعان ناۋقاستار ەم قابىلدايتىن بولادى.

مۇنداعى كەرەۋەتتەر ۋنيۆەرسيتەتتىڭ جاتاقحاناسى مەن دەمەۋشىلەر ەسەبىنەن جەتكىزىلگەن.

«1- شىلدەدە اشىلاتىن ورتالىققا كۇندىزگى ستاتسيونارعا 50 دارىگەر، 75 مەيىربيكە، 20 سانيتار قىزمەتكەرى قاجەت بولادى. سپورت كەشەنىندەگى جۇمىستى ۇيلەستىرۋگە قالاداعى 5№ ەمحانا ۇجىمى جۇمىلدىرىلادى. ستاتسيونار تاڭعى 8 دەن كەشكى 20.00 گە دەيىن جۇمىس ىستەيدى» دەلىنگەن حابارلامادا.

ايتا كەتەيىك، بۇعان دەيىن قالادا جرۆي جۇقتىرعاندار سانى 2 ەسەگە، پنيەۆمونيامەن اۋىرعاندار سانى 6 ەسەگە كوبەيگەنىن حابارلاعان بولاتىنبىز. وسىعان وراي، قالاداعى سامال-3 شاعىن اۋدانىندا جاڭا مەكتەپتەن - 400 ورىندىق، پوليتەحنيكالىق كوللەدجىنەن - 400 ورىن، ۇ و س ارداگەرلەرى ورتالىعىنان 100 ورىندىق پروۆيزورلى ورىندار اشىلعان ەدى.

سونداي-اق، تۇرعىندارعا كومەكتەسەتىن iKomek ورتالىعى اشىلدى. جەدەل جەلىدە كۇندىز- ءتۇنى تۇرعىنداردىڭ قوڭىراۋلارىنا جاۋاپ بەرىلەدى.

«109 نومىرىنە قوڭىراۋ شالعاندار قازىرگى ەپيدەميولوگيالىق جاعدايعا بايلانىستى ساۋالدارىنا جىلدام جاۋاپ الا الادى. ورتالىق تاۋلىگىنە 3000 قوڭىراۋ قابىلداۋعا قاۋقارلى. قاجەت بولعان جاعدايدا 5000 ازاماتقا دەيىن قىزمەت كورسەتە الادى. ول ءۇشىن 26 قىزمەتكەر تاۋلىك بويىنا جۇمىس جاساۋدا. iKomek ورتالىعى بارلىق ەمحانالارمەن ىڭعايلاستىرىلىپ اقپاراتتاندىرىلعان. سونىمەن قاتار iKomek ورتالىعىنىڭ 87777109109 ۆاتساپ ءنومىرى دە تۇرعىندار ءۇشىن تاۋلىك بويىنا قىزمەت ەتەدى» دەلىنگەن اكىمدىكتىڭ حابارلاماسىندا.