كوروناۆيرۋس: جوعارى وقۋ ورنىنىڭ پروفەسسورلارى مەن رەزيدەنتتەرى اۋرۋحانالاردا جۇمىس ىستەيدى

اقتوبە. قازاقپارات - اقتوبە وبلىسىندا مەديتسينالىق كوللەدج تۇلەكتەرى جەدەل جاردەم بريگادالارىنا كومەكتەسەتىن بولادى. ال ۋنيۆەرسيتەتتىڭ وقىتۋشى- پروفەسسورلارى مەن رەزيدەنتتەرى اۋرۋحانالارعا جىبەرىلەدى، دەپ حابارلايدى قازاقپارات ءتىلشىسى.

اقتوبە وبلىسىندا قازىر 4800-دەن استام مەديتسينا قىزمەتكەرى جۇمىس ىستەيدى.

«مەديتسينا ۋنيۆەرسيتەتىنىڭ 112 رەزيدەنتى مەن 165 وقىتۋشى- پروفەسسورى ەمدەۋ، كەڭەس بەرۋ جۇمىسىنا تارتىلادى. سونىمەن بىرگە بۇگىننەن باستاپ جەدەل جاردەم مەن پروۆيزورلىق ەمدەۋ ورنىنا مەديتسينالىق كوللەدجدىڭ 100-گە جۋىق تۇلەگى قوسىلدى»، - دەدى وبلىس اكىمى وڭداسىن ورازالين.

ءوڭىر باسشىسى تىكەلەي ەفير كەزىندە ءدارى- دارمەكپەن قامتاماسىز ەتۋ ءۇشىن جوسپارلى تولىقتىرۋ جۇرگەنىن، دەمەۋشىلەر ارقىلى قور جينالاتىنىن ايتتى.

«وبلىس بويىنشا 200-گە جۋىق مونيتورينگ توبى قۇرىلدى. ولار 4 مىڭنان استام تەكسەرۋ جۇرگىزدى. تۇرعىندار تاراپىنان سۇرانىس ارتقان سوڭ قىزۋ تۇسىرەتىن ءدارى، انتيبيوتيكتەر، ۆيرۋسقا قارسى پرەپاراتتاردىڭ جەتىسپەۋشىلىگى بار. ونى بىلەمىن. وبلىستاعى 573 ءدارىحاناعا ءدارى- دارمەك ۋاقتىلى كەلسە دە، تۇرعىنداردى تولىق قامتاماسىز ەتە الماي وتىر. ءدارىحانا يەلەرىنە ەسكەرتۋ بەرىلدى. سونىمەن بىرگە كورشىلەس رەسەيمەن بايلانىس ورناتىلدى»، - دەدى وڭداسىن ورازالين.

بۇعان دەيىن ءوڭىر باسشىسى تىكەلەي ەفير بارىسىندا كوروناۆيرۋس بويىنشا احۋالدى باياندادى.

اۆتور: التىناي ساعىندىقوۆا