پرەزيدەنت تاپسىرماسى: كوروناۆيرۋستان باسقا اۋرۋ تۇرلەرىنە جوسپارلى كومەك جالعاسادى
بۇل تۋرالى مەملەكەت باسشىسى قاسىم- جومارت توقايەۆ كوروناۆيرۋس ىندەتىنىڭ تارالۋىنا قارسى كۇرەس شارالارى جونىندەگى كەڭەستە ايتتى، دەپ حابارلايدى قازاقپارات ءتىلشىسى.
«ينفەكسيالىق ەمەس وزگە اۋرۋلارعا جوسپارلى مەديتسينالىق كومەكتىڭ قولجەتىمدىلىگىن قامتاماسىز ەتۋ قاجەت. تۇپتەپ كەلگەندە COVID-19 ءبىزدىڭ ومىرىمىزدە ۇزاق ۋاقىت بولاتىن سياقتى. ىندەتتىڭ وتكىر كەزەڭىندە وزگە دە اۋرۋعا شالدىققانداردى جوسپارلى اۋرۋحاناعا جاتقىزۋ، تەكسەرۋ جانە الدىن الۋ جۇمىستارى كەيىنگە قالدىرىلدى. دەگەنمەن، بۇل الداعى ۋاقىتتا حالىقتىڭ جالپى دەنساۋلىعىنا كەرى اسەرىن تيگىزۋى مۇمكىن»، - دەدى مەملەكەت باسشىسى.
سوندىقتان قازاقستان پرەزيدەنتى جاڭا جاعدايدا ونكولوگيالىق، كارديولوگيالىق، پۋلمونولوگيالىق جانە وزگە دە مەديتسينالىق جوسپارلى كومەكتى قاۋىپسىز كورسەتۋ بويىنشا شارالار ازىرلەۋ قاجەتتىگىن باسا ايتتى.
«بۇل جەردە تەلەمەديتسينانى، قاشىقتان كەڭەس بەرۋدى، ءدارى- دارمەكتى دەر ۋاقىتىندا جەتكىزۋدى جانە قاجەتتى تەكسەرۋلەردى جۇرگىزۋدى پايدالانۋ مۇمكىندىگىن جانداندىرۋ ماڭىزدى»، - دەدى قاسىم- جومارت توقايەۆ.
اۆتور: مارلان جيەمباي