پرەزيدەنت قازاقستاندىقتاردىڭ ءومىرى مەن دەنساۋلىعىن قورعاۋ بويىنشا ۇلتتىق جوسپار ازىرلەۋدى تاپسىردى
كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستە قاسىم- جومارت توقايەۆ ۇكىمەتكە شۇعىل شارالاردى قابىلداۋمەن بىرگە، كوروناۆيرۋس پاندەمياسىنىڭ ۇزاق مەرزىمىنە دايىندىقتى باستاۋدى جۇكتەدى. وسىعان بايلانىستى ۇكىمەتكە ورتا مەرزىمدى كەلەشەكتە قازاقستاندىقتاردىڭ ءومىرى مەن دەنساۋلىعىن قورعاۋ بويىنشا ۇلتتىق جوسپار ازىرلەۋ تاپسىرىلدى.
«اكىمدەر مەن مينيسترلەرگە بيۋدجەتتى قايتا قاراپ، قاجەتسىز شىعىنداردىڭ بارىنەن - كونفەرەنسيالاردان، دوڭگەلەك ۇستەلدەردەن، سالتاناتتى شارالار مەن كونسالتينگىلەردەن، PR- قىزمەتتەردەن باس تارتۋى كەرەك. بۇل اقشانىڭ ءبارى دە ەپيدەميامەن كۇرەسكە جۇمىلدىرىلۋى ءتيىس»، - دەدى پرەزيدەنت.
سونىمەن بىرگە مەملەكەت باسشىسى حالىق ءۇشىن ازىق- تۇلىكتىڭ تۇراقتى باعاسى مەن قولجەتىمدىلىگىن، ەكونوميكالىق بەلسەندىلىكتى ساقتاۋدى، سيفرلىق تەحنولوگيالاردى دامىتۋدى جۇكتەدى. ەكونوميكالىق ءوسىمدى قالپىنا كەلتىرۋ بويىنشا كەشەندى جوسپار جوسپارلى ءارى تولىققاندى جۇزەگە اسىرىلۋى كەرەكتىگىن مىندەتتەدى. پرەزيدەنت بۇل ماسەلەلەر اكىمدەردىڭ ءجىتى باقىلاۋىندا بولۋى تيىستىگىن ەسكەرتتى.
«ءيا، بۇل قاۋىپتى اۋرۋ. ونىڭ ەمىنە ازىرگە ۆاكسينا جاسالعان جوق. الايدا دۇربەلەڭگە بەرىلمەۋ كەرەك. بارىنەن بۇرىن زاڭعا قايشى ارەكەتكە بارماي، دارىگەرلەرگە ءتىل تيگىزبەي، سانيتارلىق رەجيمدى بۇزباۋ كەرەك. ناۋقاستار ۇرەي مەن سەلقوستىققا بەرىلمەۋى ءتيىس. ەم- دوممەن بىرگە ادامنىڭ فيزيكالىق جانە رۋحاني جاي- كۇيى ونىڭ تەزىرەك ەمدەلىپ كەتۋىنە سەپتىگىن تيگىزەدى. دەنساۋلىق ساقتاۋ ءمينيسترى مەن دارىگەرلەردىڭ تالاپتارى مەن كەڭەسىن ۇستانۋدى سۇرايمىن. ءبىزدىڭ كۇش- جىگەرىمىزدىڭ ءبارى دە ءبىزدىڭ ەلدىڭ باستى بايلىعى - قازاقستان رەسپۋبليكاسى ازاماتتارىنىڭ ءومىرى مەن دەنساۋلىعىن ساقتاۋعا باعىتتالعان»، - دەدى مەملەكەت باسشىسى.
اۆتور: ايان بەكەن ۇلى