قاسىم- جومارت توقايەۆ: ازاماتتارعا ەمدەۋدىڭ پروتوكولىن، الگوريتمىن جەتكىزۋ كەرەك

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ ىندەتتىڭ كەڭ تارالۋىنا بايلانىستى تۇرعىنداردان ارىز- شاعىم كوپ ءتۇسىپ جاتقانىن جەتكىزدى.

بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي جەلىدەگى پاراقشاسىندا جازدى.

«www.coronavirus2020.kz سايتىنا قىرىق مىڭعا جۋىق سۇراق كەلىپ ءتۇستى. قازىرگى تاڭدا ونىڭ ۇشتەن بىرىنە عانا جاۋاپ بەرىلدى. مۇنداي قارىم- قاتىناستىڭ ناتيجەسىندە تەرىس ءارى جالعان اقپاراتتار ءورشىپ تۇر. بۇل ءبىزدىڭ جۇمىسىمىزدى ودان سايىن قيىنداتۋدا. اقپاراتتىق جۇمىستارعا قاتىستى ءتاسىلدى تۇبەگەيلى وزگەرتۋ كەرەك. تەلەارنالاردان، تىكەلەي ەفير ارقىلى دارىگەرلەردەن كەڭەس الىپ، سۇراقتارىنا جاۋاپ الاتىن كۇندەلىكتى باعدارلامالاردى ۇيىمداستىرۋعا نەگە بولمايدى؟ ازاماتتارعا ەمدەۋدىڭ پروتوكولىن، الگوريتمىن جەتكىزۋ كەرەك. ءدارى- دارمەكتەر، ونى پايدالانۋ جونىندە تۇسىنىكتەمە بەرۋ قاجەت»، - دەدى پرەزيدەنت.

ەسكە سالساق، بۇعان دەيىن قاسىم- جومارت توقايەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندە كەڭەس وتكىزەتىندىگى تۋرالى حابارلاعان بولاتىنبىز.