پرەزيدەنت بىرنەشە اكىمگە سوگىس جاريالادى
بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي جەلىدەگى پاراقشاسىندا جازدى، دەپ حابارلايدى قازاقپارات.
«قاسىم-جومارت توقايەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستە وزدەرىنە جۇكتەلگەن مىندەتتەردى شالا ورىنداعان ءبىرقاتار شەنەۋنىكتىڭ جۇمىسىن سىنعا الدى. وسىعان بايلانىستى مەملەكەت باسشىسى جۇمىسىنا سالعىرت قاراعانى ءۇشىن شىمكەنت قالاسىنىڭ اكىمى م. ايتەنوۆكە، اقتوبە وبلىسىنىڭ اكىمى و. ورازالينگە، پاۆلودار وبلىسىنىڭ اكىمى ءا. سقاقوۆقا جانە ۆەدومستۆوارالىق كوميسسيانىڭ ءتوراعاسى ە. توعجانوۆقا سوگىس جاريالادى»، - دەدى بەرىك ءۋالي.
سونداي-اق، نۇر-سۇلتان قالاسىنىڭ اكىمى ا. كولگىنوۆكە، الماتى قالاسىنىڭ اكىمى ب. ساعىنتايەۆقا، سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ا. جۇماعاليەۆكە ەسكەرتۋ جاسالدى.
«اتىراۋ، قوستاناي جانە باتىس قازاقستان وبلىستارىنىڭ اكىمدەرىنە وڭىرلەردەگى احۋالدى رەتتەۋ قاجەتتىگىن ەسكەرتتى. اتالعان ماسەلە بارلىق وبلىستىڭ باسشىلارىنا دا قاتىستى ەكەنىن ايتتى»، - دەپ تولىقتىردى پرەزيدەنتتىڭ باسپا ءسوز حاتشىسى.
ەسكە سالساق، بۇعان دەيىن قاسىم-جومارت توقايەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندە كەڭەس وتكىزەتىندىگى تۋرالى حابارلاعان بولاتىنبىز.