ديماش قۇدايبەرگەن قىتايدىڭ تانىمال پلاتفورماسىندا جەڭىمپاز بولدى
7 جانە 28-ماۋسىم ارالىعىندا قىتايدىڭ تانىمال Sina پلاتفورماسىندا «Leading 2020 Sina Entertainment festival» جوباسىنىڭ قاتىسۋشىلارىنا داۋىس بەرۋ ءراسىمى ءوتتى. ۇيىمداستىرۋشىلار - Sina News جانە Sina Entertainment. 21 كۇنگە سوزىلعان داۋىس بەرۋ قورىتىندىسى بويىنشا ديماش 1 ميلليون 404 مىڭ 488 داۋىس جيناپ، «ەڭ ۇزدىك تانىمال شەتەل ءارتيسى» نوميناتسياسىن جەڭىپ الدى. Sina (قىتاي تىلىندە: 新浪 ؛ pinyin: Xīn Làng) - قىتايلىق ينتەرنەت- كومپانيا.
ول دۇنيەجۇزىنە قولجەتىمدى حابار الماسۋ پلاتفورماسىن ۇسىنىپ وتىر. كومپانيانىڭ 4 نەگىزگى قىزمەت باعىتى بار: ولار Sina Weibo، Sina Mobile، Sina Online جانە Sinanet. Sina-نىڭ الەم بويىنشا 100 ميلليوننان استام تىركەلگەن قولدانۋشىسى بار.
«بۇگىندە Sina كومپانياسى جانە ونىڭ پلاتفورمالارى قىتايدىڭ مەدياكەڭىستىگى مەن كوڭىل كوتەرۋ سالاسىنا ۇلكەن ىقپالىن تيگىزىپ وتىر. Sina Weibo - Twitter- گە ۇقساس، قىتايداعى ميكروبلوگينگ نارىعىنىڭ %56,5 قامتىپ وتىرعان الەۋمەتتىك ميكروبلوگ- جەلى. سونىمەن قاتار، وزدەرىنىڭ سۇيىكتى ايدولدارىنا قولداۋ ءبىلدىرۋ ءۇشىن جينالاتىن فاناتتاردىڭ ەڭ ءىرى ءارى ماڭىزدى پلاتفورماسى. سونىمەن بىرگە، تانىمال ادامدار Weibo جەلىسىندە جەكە اككاۋنتتار تىركەپ، شىعارماشىلىعىمەن ءبولىسىپ، فاناتتارىمەن بايلانىس ورناتادى»، - دەلىنگەن اقپاراتتا.
ءمالىم ەتىلگەندەي، «Leading 2020 Sina Entertainment festival» شاراسىنىڭ باستى ماقساتى - 2020 -جىلدىڭ ءبىرىنشى جارتىسىندا ۇزدىك دەپ تانىلعان فيلمدەر، تەلەباعدارلامالار، مۋزىكالىق شىعارمالار جانە ۆارەتەمەن كوپشىلىكپەن ءبولىسۋ. وسىلايشا، ارتيستەرمەن جانە ولاردىڭ جۇمىستارىمەن نەعۇرلىم كوپ ادام تانىسىپ، ويىن-ساۋىق يندۋسترياسىنىڭ دامۋىنا وڭ اسەرىن تيگىزەدى.
