قازاقستاندىق وليمپيادا جۇلدەگەرى كوروناۆيرۋسكە شالدىقتى

تالدىقورعان. قازاقپارات - وليمپيادا ويىندارىنىڭ جۇلدەگەرى نۇرباقىت تەڭىزبايەۆ كوروناۆيرۋس جۇقتىردى.

قازىر ول تالدىقورعانداعى وبلىستىق اۋرۋحانادا ەم الىپ جاتىر، دەپ حابارلايدى قازاقپارات ءتىلشىسى. «ءيا، الىنعان سىناما وڭ ناتيجە كورسەتتى. پنيەۆمونيا دياگنوزىن قويدى. اۋرۋحانادا ەمدەلىپ جاتقانىما ءبىر اپتا بولدى. قازىر ءوزىمدى جاقسى سەزىنەمىن. العاشقى كۇندەرى قيىن بولدى: دەنە قىزۋىم كوتەرىلىپ، قاتتى جوتەلدىم. جەدەل جاردەم شاقىردىم. دارىگەرلەر جاقسى كومەكتەسۋدە. ءقازىر كوبى كوروناۆيرۋسپەن اۋىرىپ جاتىر. كوز جۇمعاندار دا بار. سوندىقتان ەمدەلىپ، دەنساۋلىقتى كۇتۋ كەرەك»، - دەدى نۇرباقىت تەڭىزبايەۆ.

نۇرباقىت مولداحمەت ۇلى 1983 -جىلى 10-ساۋىردە الماتى وبلىسى، پانفيلوۆ اۋدانى، ءۇشارال اۋىلىندا دۇنيەگە كەلگەن. گرەك-ريم كۇرەسىنەن ازيانىڭ بىرنەشە دۇركىن چەمپيونى، 2008 -جىلعى بەيجىڭ وليمپياداسىنىڭ كۇمىس جۇلدەگەرى، 2009 -جىلعى الەم چەمپيوناتىنىڭ قولا جۇلدەگەرى اتانعان كاسىبي سپورتشى.

2014 -جىلى الماتى وبلىستىق جوعارعى سپورت شەبەرلىك مەكتەبىنىڭ ديرەكتورى قىزمەتىنە تاعايىندالدى. 2018 -جىلدىڭ قازان ايىنان باستاپ الماتى وبلىستىق دەنە شىنىقتىرۋ جانە سپورت باسقارماسىنىڭ باسشىسى لاۋازىمىن اتقارادى. تالدىقورعان قالاسىنىڭ جانە پانفيلوۆ اۋدانىنىڭ قۇرمەتتى ازاماتى، «قۇرمەت» وردەنىنىڭ يەگەرى. ۇيلەنگەن، ەكى بالاسى بار.

ەستەرىڭىزگە سالا كەتەيىك، بۇعان دەيىن «قايسار» فۋتبول كلۋبىنىڭ 25 ويىنشىسى كوروناۆيرۋس جۇقتىرعانى حابارلانعان بولاتىن.

اۆتور: سامال قابىشەۆا