قازاقتىڭ حالىق ءانى «ءجىپتى ينە» بەيجىڭ ساحناسىندا شىرقالدى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

«اجەلەرى تاربيەسى قازىنالى بۇلاقتىڭ كوزى» - «تامدى شارۋاگەرى» گازەتى

وزبەكستاندا شىعاتىن «تامدى شارۋاگەرى» گازەتىندە وسى اپتادا اكە مەن بالا، اجە مەن نەمەرە تۋرالى قاتارىنان ەكى ماقالا جارىق كوردى. ونىڭ بىرىنشىسىندە «سوزدەن سۇرىنگەن» دەگەن تاقىرىپپەن ۇلى اقىن اباي مەن ونىڭ اكەسى قۇنانباي اراسىنداعى ەل اۋزىنا تاراعان اڭگىمەسى ايتىلادى. اتالعان جازبادا ۇلى اقىن قانشا دانىشپان بولسا دا اكەسىنىڭ ءپاتۋالى سوزىنە توقتاعانى مازمۇندالادى.

«اباي قانشالىقتى عۇلاما، دانا بولسا دا، قۇنانبايدىڭ الدىنا كەلگەندە سوزدەن سۇرىنەدى ەكەن. بىردە اكەسىمەن اڭگىمە- دۇكەن قۇرىپ وتىرىپ، اجەسى زەرە، اناسى ۇلجاننىڭ اقىلدىلىعىن ماقتان ەتكەن قۇنانبايدىڭ سوزىنە ماسايراعان اباي: «اكە، مەن ناعاشىلارىما تارتقان ەكەنمىن» - دەپ، ايتىپ قالادى. اكەسى: ءاي، اباي، بايگەدەن كەلگەن تۇلپاردى مىناۋ قاي ايعىردىڭ بالاسى دەپ سۇرايدى. ءبىراق قاي بيەدەن تۋدى دەپ سۇراعاندى ەستىگەن جوقپىن» - دەپتى.

ءوزىنىڭ ارتىق كەتكەنىن تۇسىنگەن اباي اكەسىنەن كەشىرىم سۇراپتى. ءبىر وتىرىستا اباي: «مەن اكەمنەن دە وزدىم» - دەپتى. بۇل ءسوز قۇنانبايدىڭ قۇلاعىنا دا جەتەدى. قۇنانباي: «ابايىڭا سالەم ايت، مەنەن وزباق تۇگىل، ماعان جەتۋ ءۇشىن ابايداي ۇل تۋعىزىپ السىن»، دەپتى دەپ تۇيىندەيدى ەل اۋزىنان دايىنداعان مارات ساماتوۆ اتتى اۆتور.

«تامدى شارۋاگەرى» گازەتىندەگى ەكىنشى جازبا «اسىل اجەم» دەگەن تاقىرىپتا جاريالانعان ەكەن. وندا ماقالا اۆتورى بالا تاربيەسىندە اجەنىڭ بەرەر ءتالىمى بارىنەن جوعارى ەكەنىن ايتادى. وعان شوقان ءۋاليحانوۆتىڭ ايعانىم اجەسى، اباي اتامىزدىڭ زەرە، مۇحتار اۋەزوۆتىڭ ءدىناسىل اجەلەرىن مىسال رەتىندە كەلتىرەدى ءسوز اراسىندا.

ماقالا اۆتورىنىڭ ايتۋىنشا، اجەلەرىمىز ءتالىم- تاربيەنىڭ باستاۋى، بىزگە ۇلگى- ونەگە كورسەتەر اسىل جاندار، قازىنالى بۇلاقتىڭ قاينار كوزى ەكەن. جانۇيادا بالا تاربيەلەۋدە الاتىن ورنى ەرەكشە - وسى مەيىرىمدى اجەلەرىمىز. قازاق وتباسىنداعى اجە ورنى ەرەكشە ءارى قادىرلى. اجە- وتباسىنىڭ عانا ەمەس، اۋلەتتىڭ دە ۇيىتقىسى، اعايىن- ابىسىنداردىڭ بىرلىگىن، تاتۋلىعىن ساقتايتىن سىيلى اناسى، كەيىنگى جاستاردىڭ، كەلىندەردىڭ تاربيەشىسى ءارى اقىلگويى. «ونىڭ دالەلى شوقان ءۋاليحانوۆتىڭ ايعانىم اجەسى، اباي اتامىزدىڭ زەرە، مۇحتار اۋەزوۆتىڭ ءدىناسىل اجەلەرى قازىنالى بۇلاقتىڭ كوزى بولعان اجەلەرى ەدى... الايدا اتا- اجە مەن نەمەرە اراسىنداعى وسىنداي بايلانىس بۇگىنگى قوعامدا سيرەپ بارا جاتقانى مەنى قاتتى قىنجىلتادى»، دەپ جازادى اۆتور.

اۆتوردىڭ كەلتىرگەن دەرەكتەرىنە سۇيەنسەك، ءوز ومىرىندە دە اجەسىنەن العان تاربيەسى ەرەكشە بولعان ەكەن.

«...مەنىڭ دە اجەم ءوزىم ءۇشىن ولاردان كەم تۇسپەيتىن. سويلەگەن ءسوزى، ىستەگەن ءىسى، ايتقان اقىلى قاشاندا قونىمدى- اق بولاتىن. ال، اجەمنىڭ ايتاتىن ەرتەگىلەرى مۇلدەم ەرەكشە. كىشكەنتاي كەزىمنەن كۇندە كەشكىسىن «ەرتە، ەرتە، ەرتەدە، ەشكى ءجۇنى بورتەدە...» دەپ جاڭا ەرتەگىسىن باستايتىن. سەبەبى، ونىڭ وقىپ بىتىرگەن كىتاپتارى وتە كوپ. ءبىر قىزىعى، قاي كىتاپتان قاي كەيىپكەردى سۇراساڭ دا مۇدىرمەيتىن. مەن ونىڭ ەرتەگىلەرىنە، اڭگىمەلەرىنە قۇمارتتىم. ءار ءسات ءارتۇرلى ەرتەگى باياندايتىن اجەم كەشەگە دەيىن ءبىر ەرتەگىسىن ماعان قايتالاپ ايتقان ەمەس. اجەم مەنى، مەن اجەمدى ەرەكشە قاتتى جاقسى كوردىك... ءبارى دە اللانىڭ قالاۋىمەن بولادى دەگەن نانىمعا سەنگەن قازاقپىز، دەگەنمەن، ۇرپاقتار ساباقتاستىعىن جالعاستىراتىن دا، ءومىر كوشىنىڭ كورىگىن قىزدىراتىن دا ەرەكشە جارالعان تۇلعالار اتا- اجەلەر. ءبىزدىڭ اۋلەتتىڭ كوش سالتاناتىنا كورىك بەرگەن بولمىسى بىتىك، انالىق رۋحى بيىك مەنىڭ اسىل اجەم ەدى دەپ نىق سەنىممەن ايتا الامىن. اجەمنىڭ بەينەسى ماڭگى ەستە، ونى ۋاقىت الاسارتا المايدى. اسىل اجە، نەمەرەلىك پەيىلىممەن اجەلىك مەيىرىمىڭە باس يەمىن» ، دەپ جازادى ماقالا اۆتورى زارافشان قالاسىنىڭ تۇرعىنى مەرەكە كاتتابوسىنوۆا.

موڭعوليا پارلامەنت سايلاۋىندا ءۇش قازاق جەڭىسكە جەتتى - Kaznews

2020 -جىلعى موڭعوليا پارلامەنتى سايلاۋىنىڭ ناتيجەلەرى جاريالانىپ، جاقىن ارادا پارلامەنتتىڭ جاڭا مۇشەلەرى انت بەرەدى، دەپ حابارلايدى موڭعوليالىق Kaznews اقپاراتتىق پورتالى.

اتالعان اقپارات كوزىنىڭ كەلتىرگەن دەرەگىنە سۇيەنسەك، پارلامەنت تۋرالى زاڭدا كورسەتىلگەندەي ءبىرىنشى سەسسيانى 76 دەپۋتاتتىڭ ىشىندەگى ەڭ قارت مۇشە باسقارۋى ءتيىس. سوندىقتان بۇل جولعى ءبىرىنشى سەسسيانى بايان-ولگي ايماعىنان سايلانعان 66 جاستاعى بادەلحان قابدىسىلام ۇلى باسقارادى . ول 1954 -جىلى تۋعان جانە جاڭا پارلامەنتتىڭ ەڭ قارت مۇشەسى اتانىپ وتىر.

ايتا كەتۋ كەرەك، 2020 -جىلعى موڭعوليا پارلامەنت سايلاۋىندا بايان-ولگي ايماعىنان بادەلحان قابدىسىلام ۇلى، اۋباكىر تىلەۋحان ۇلى، بەيسەن بۇلان ۇلى قاتارلى ءۇش قانداسىمىز جەڭىسكە جەتكەن بولاتىن.

«2020 -جىلعى پارلامەنت سايلاۋىنىڭ قورىتىندىسى بويىنشا موڭعول حالىق پارتياسىنان اتىن ۇسىنۋشى بادەلحان قابدىسىلام ۇلى بايان- ولگيي ايماعىنان قايتا سايلاندى. ول 23379 داۋىسپەن جەڭىسكە جەتتى. سونىمەن قاتار، بايان- ولگييلىكتەر موڭعول حالىق پارتياسى اتىن ۇسىنعان ۇمىتكەر اۋباكىر تىلەۋحان ۇلىنا 22662 ادام داۋىس بەرىپ، سەنىم جۇكتەدى. ءۇشىنشى مانداتتى دەموكراتيالىق پارتيادان اتىن ۇسىنۋشى بەيسەن بۇلان ۇلى 22448 داۋىسپەن جەڭىپ الدى. ناتيجەسىندە، پارلامەنتكە بۇرىن سايلانباعان جاڭا ساياساتكەرلەر كەلەسى ءتورت جىلدا بايان- ولگي حالقىنىڭ مەملەكەتتەگى وكىلى بولادى»، دەپ جازادى Kaznews اقپاراتتىق پورتالى.

قازاقتىڭ حالىق ءانى «ءجىپتى ينە» بەيجىڭ ساحناسىندا شىرقالدى - قىتايدىڭ «ورتالىق حالىق راديوسى» (CNR)

21-ماۋسىم كۇنى قىتاي ورتالىق تەلەۆيزياسى باس ستانتسياسى وتكىزگەن قارتتارعا ارنالعان «الپىس جاستان اسسادا، التى قىردان اسىرا ءان شىرقاعان» اتتى قارتتار قور جارىسى ورتالىق تەليەۆيزياسىنىڭ «CCTV-1» جانە «CCTV-12» ارناسىندا تاراتىلدى، دەپ حابارلايدى kazakcnr.com اقپاراتتىق پورتالى.

«بۇل جولعى ونەر بايگەسىندە ەلىمىزدىڭ ەڭ ۇلكەن تەلەارنالارىندا ورىندالعان ءان «ءجىپتى ينە» اتتى قازاقتىڭ حالىق ءانى. بۇل اندە اسقار تاۋ، ايدىن كول، مالدى اۋىل، اتان جىلىكتى جىگىتتەر مەن ارۋ قىزدار جىرعا قوسىلىپ، تاماشا دا باقىتتى ومىرگە ماقتاۋ ايتىلادى. قۇلاقتان كىرىپ بويدى الار تامىلجىعان ءتاتتى اۋەن بىردەن جانىڭىزدى جادىراتىپ، بويىڭىزدى بالقىتىپ، قيالىڭىزدى قياندارعا سامعاتادى. ەندەشە، وسى شاعانتوعاي اۋداندىق «مەيىربان انالار» ۇيىمىنىڭ «تاۋ گۇلى» حالىقتىق ونەر ۇيىرمەسى ورىنداعان قازاقتىڭ حالىق ءانى «ءجىپتى ينەنى» بىرلىكتە تىڭداپ كورەلىك»، دەپ جازادى قىتايدىڭ «ورتالىق حالىق راديوسى».

ۆيدەو ويىنى رەتسەپتپەن ساتىلاتىن بولدى – تۇركيا راديو تەلەديدار اگەنتتىگى

Akili Interactive تاراپىنان جەتىلدىرىلگەن «EndeavorRx « اتتى ويىنعا ساتۋ رۇقساتى بەرىلدى، دەپ حابارلايدى تۇركيا راديو تەلەديدار اگەنتتىگى. وسى اپتادا تۇركيالىق TRT اقپاراتتىق پورتالى وسىنداي قىزىقتى حابار تاراتقان بولاتىن.

اتالعان ب ا ق- تىڭ دەرەگىنشە، ا ق ش- تىڭ ازىق- تۇلىك جانە ءدارى باسقارماسى زەيىن جەتكىلىكسىزدىگى جانە گيپەراكتيۆتىلىك سيندرومىنا شالدىققان بالالاردىڭ ەمدەلۋىندە قولدانۋ ماقساتىمەن ءبىرىنشى رەت ءبىر ۆيدەو ويىنىن تەك دارىگەردىڭ رۇقساتىمەن عانا ساتۋعا رۇقسات بەرگەن. اتالمىش ويىن 600 بالادا جەتى جىل بويى سىناقتان وتكەن. زەرتتەۋ ناتيجەسىنە سايكەس، 8-12 جاس ارالىعىنداعى بالالاردىڭ زەيىنىن جەتىلدىرۋ ماقساتىمەن، وسى ويىننىڭ ساتىلۋىندا دارىگەردىڭ رەتسەپتى بولۋى كەرەك دەپ شەشكەن.

وزبەكستاندا «مۇعالىمدەر قاۋىمداستىعى» قۇرىلدى - «ءوزا» اقپارات اگەنتتىگى

«مۇعالىمدەر قاۋىمداستىعى» وزبەكستانداعى جالپى ورتا جانە مەكتەپتەن تىس ءبىلىم بەرۋ جۇيەسىن رەفورمالاۋ باسىمدىقتارىنا نەگىزدەلگەن، حالىق اعارتۋ جۇيەسىندە جۇمىس ىستەيتىن مۇعالىمدەرگە جان- جاقتى قولداۋ كورسەتەتىن بولادى، دەپ حابارلايدى «ءوزا» اقپارات اگەنتتىگى. «ءوزا» اقپاراتتىق اگەنتتىگىنىڭ دەرەگىنشە، «مۇعالىمدەر قاۋىمداستىعى» 2020 -جىل 3-ماۋسىمدا ۇكىمەتتىك جانە كوممەرتسيالىق ەمەس قوعامدىق بىرلەستىك تۇرىندە تىركەۋدەن وتكەن. حالىق ءبىلىم مينيسترلىگى قوعامدىق بىرلەستىكتىڭ نەگىزگى ماقساتى وزبەكستانداعى جالپى ورتا جانە مەكتەپتەن تىس ءبىلىم بەرۋ جۇيەسىن رەفورمالاۋ باسىمدىقتارىنا نەگىزدەلگەن، حالىق اعارتۋ جۇيەسىندە جۇمىس ىستەيتىن مۇعالىمدەرگە جان- جاقتى قولداۋ كورسەتۋگە باعىتتالعان جانە ول بۇكىل رەسپۋبليكا اۋماعىندا جۇمىس اتقارادى. «اتاۋلى جوبانى ەۋروپالىق وداق قارجىلاندىرادى جانە قوعامداعى مۇعالىمدەردىڭ بەدەلىن كوتەرۋدى جانە الەۋمەتتىك قورعاۋدى كۇشەيتۋ، قۇقىقتىق ساۋاتتىلىقتى ارتتىرۋدى ماقسات ەتكەن. سونداي-اق مۇعالىمدەردىڭ كاسىبي الەۋەتىن دامىتۋدى باعىتتالعان» ، دەپ تۇيىندەيدى «ءوزا».

الەمدەگى العاشقى اسپالى شىنى كوپىر يراندا سالىندى - «فارس» اقپارات اگەنتتىگى

اعىمداعى اپتادا يراندىق parstoday اگەنتتىگىندە وسىنداي تاقىرىپتاعى اقپارات جارىق كورەدى. يراننىڭ سولتۇستىك- باتىسىنداعى اردەبيل قالاسىندا جەرگىلىكتى ينجەنەرلەردىڭ جوبالاۋىمەن تاۋ ورتاسىنداعى سايدان 70 مەتر بيىكتىكتە ۇزىندىعى 200 مەتردى قۇرايتىن الەمدەگى العاشقى اسپالى شىنى كوپىر سالىندى، دەپ حابارلايدى parstoday.

اتالعان اقپارات كوزىنىڭ كەلتىرگەن دەرەگىنە سۇيەنسەك، كوپىردىڭ ەدەنى 5 قاتپارلى شىنى مەن لاميناتتان تۇرادى. تاڭعاجايىپ كوپىردە قادام باسقاندا اياقتىڭ استىنان وزەن، ورمان، جارتاستان تۇراتىن ادەمى پانوراما كورىنەدى ەكەن.

اۆتور: بەيسەن سۇلتان ۇلى