قاراعاندىدا كوپبالالى وتباسىلاردى قولداۋ ورتالىعى اشىلدى
مۇندا جۇمىسقا ورنالاسۋ، الەۋمەتتىك كومەك كورسەتۋ، تۇرعىن ءۇي باعدارلامالارى جانە باسقا دا ماسەلەلەر بويىنشا كەڭەس الۋعا بولادى، دەپ حابارلايدى قازاقپارات.
ورتالىق قاراعاندى قالاسىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ قولداۋىمەن «وتباسى مەكتەبى» قوعامدىق قورىنىڭ باستاماسىمەن اشىلدى. مۇندا كوپبالالى وتباسى مۇشەلەرى بىلىكتى پسيحولوگتاردىڭ، زاڭگەرلەر مەن الەۋمەتتانۋشىلاردىڭ كومەگىن الا الادى.
ورتالىققا دەنساۋلىق ساقتاۋ، ءبىلىم بەرۋ، جۇمىسقا ورنالاستىرۋ، كاسىپكەرلىك، الەۋمەتتىك كومەك كورسەتۋ جانە تۇرعىن ءۇي باعدارلامالارى ماسەلەلەرى بويىنشا جۇگىنۋگە بولادى. كەڭەس الدىن الا جازىلۋ بويىنشا جۇرگىزىلەدى - بۇل جۇمىس فورماتى كارانتين شارتتارىمەن تۇسىندىرىلەدى.
ورتالىقتا ايىنا ءبىر رەت اتاۋلى الەۋمەتتىك كومەك ۇسىنۋدان باستاپ كوپبالالى وتباسىندا ءوزارا قارىم - قاتىناس قۇرۋدىڭ پسيحولوگيالىق تاسىلدەرىنە دەيىن ءتۇرلى تاقىرىپتارعا سەمينارلار وتكىزۋدى جوسپارلاپ وتىر. ءبىرىنشى سەمينار ورتالىقتىڭ سالتاناتتى اشىلۋىنان كەيىن ءوتتى.
«تۇرعىن ءۇي قۇرىلىس جيناق بانكىنىڭ» ماماندارى «باقىتتى وتباسى» مەملەكەتتىك باعدارلاماسى بويىنشا يپوتەكانى قالاي الۋ كەرەكتىگىن ايتتى. سەمينار بارلىق سانيتارلىق تالاپتاردى ساقتاي وتىرىپ ءوتتى. ورتالىقتىڭ اشىلۋ سالتاناتىنا قاراعاندى قالاسى اكىمىنىڭ ورىنباسارى نۇرلان بيكەنوۆ، جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىلىعى، «وتباسى مەكتەبى» قورىنىڭ وكىلدەرى جانە كوپبالالى انالار قاتىستى.
«جانۇيا» ورتالىعى كەلەسى مەكەن-جاي بويىنشا ورنالاسقان: ءاليحانوۆ كوشەسى، 5، 411 كابينەت. انىقتاما تەلەفونى: 87084251939.