الماتىدا جەدەل جاردەمنىڭ كەشىگۋ سەبەبى اتالدى

الماتى. قازاقپارات - ماۋسىم ايىندا قازاقستاندىقتار جەدەل جاردەمدى ءجيى شاقىرا باستاعان. وسى سەبەپتى، مەديتسينالىق كومەكتى كۇتۋ ۋاقىتى دا ۇزارعان، دەپ حابارلايدى قازاقپارات ءتىلشىسى.

بۇگىن الماتى قالالىق قوعامدىق كەڭەسىنىڭ ونلاين وتىرىسى ءوتتى. وندا قوعام قايراتكەرى، جۋرناليست سەرگەي پونوماريەۆ تۇرعىنداردان ءتۇسىپ جاتقان سۇراقتى قويدى. ولاردىڭ سوزىنشە، قوڭىراۋ شالىنعاننان كەيىن جەدەل جاردەمنىڭ كەلەتىن ۋاقىتى ەكى ساعاتتان ەكى كۇنگە دەيىن سوزىلادى. مۇلدەم كەلمەي قالاتىن جاعدايلار دا بولادى.

«ءيا، ءبىز بۇل جاعداي تۋرالى بىلەمىز. تۇرعىندار بايلانىس ورتالىعىمىزعا شاعىمدارىن ايتىپ، حابارلاسادى. قازىر جەدەل جاردەم قىزمەتىنە جۇكتەمە ارتتى. كۇنىنە 6 مىڭعا جۋىق قوڭىراۋ تۇسەدى. ولاردىڭ %50 اۋرۋحاناعا جاتقىزۋمەن جانە جەدەل جاردەمنىڭ كەلۋىمەن بايلانىستى: %30 جەدەل جاردەم بويىنشا، %20 اۋرۋحاناعا جاتقىزۋ بويىنشا»، - دەدى «مىندەتتى الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ باسقارما ءتوراعاسى ايباتىر جۇماعۇلوۆ.

ونىڭ ايتۋىنشا، قازىر بارلىق ماسەلەنى شەشۋ مۇمكىن بولماي جاتىر.

«ءار جاعدايدى جەكە قاراستىرۋعا تىرىسامىز جانە ولاردى مۇمكىندىگىنشە شەشۋگە ارەكەت جاسايمىز»، - دەدى ول.

ءوز كەزەگىندە، ۇلتتىق شۇعىل مەديتسينانى ۇيلەستىرۋ ورتالىعى باسقارما ءتوراعاسىنىڭ مىندەتىن اتقارۋشى باۋىرجان ءجۇسىپوۆ كۇنىنە شاقىرتۋلارعا رەسپۋبليكا بويىنشا 1400 بريگادا شىعاتىنىن اتاپ ءوتتى.

«بۇگىنگى تاڭدا بىزدە 1900 گە جۋىق جەدەل جاردەم كولىگى بار. ارينە، كولىك جەتىسپەۋشىلىگى بايقالادى. دەسە دە، اتالعان پروبلەمانى اقىرىنداپ شەشىپ جاتىرمىز. ماسەلەن، وتكەن جىلى 300 گە جۋىق جەدەل جاردەم كولىگى ساتىپ الىندى. بيىل 800 دانا ساتىپ الۋدى جوسپارلاپ وتىرمىز. قالىپتاسقان جاعدايعا بايلانىستى جەدەل جاردەم سالاسىن زاماناۋي جابدىقتارمەن قامتاماسىز ەتۋگە دە ەرەكشە كوڭىل ءبولىنىپ وتىر. جىل سوڭىنا دەيىن تاعى 800 دەن استام كولىك ساتىپ الىنباق»، - دەدى باۋىرجان ءجۇسىپوۆ.

ونىڭ ايتۋىنشا، ۇستىمىزدەگى جىلدىڭ قاڭتار-مامىر ايلارى ارالىعىندا جەدەل جاردەم بريگادالارى 3 ميلليونعا جۋىق قوڭىراۋعا قىزمەت كورسەتكەن.

«وتكەن جىلمەن سالىستىرعاندا بۇل كورسەتكىش ەداۋىر ۇلعايعان. ەلدە جەدەل جاردەم قىزمەتىنىڭ جۇكتەمەسى %40 ارتتى»، - دەدى ول.

سونىمەن قاتار، ب. ءجۇسىپوۆ جۇكتەمەنىڭ ارتۋىنا بايلانىستى قىزمەت كورسەتۋ ءتارتىبىنىڭ وزگەرگەنىن دە تىلگە تيەك ەتتى. ماسەلەن، ناۋقاستىڭ ومىرىنە قاۋىپ تونگەن جاعدايدا بريگادا 10-15 مينۋتتا جەتەدى.

ال ايقىن قاۋىپ بولماسا، كەلۋ ۋاقىتى 60 مينۋتقا دەيىن سوزىلادى. بۇعان قوسا، كوروناۆيرۋس جۇقتىرعاندارعا كومەكتەسۋدىڭ دە ءوز الگوريتمى بار.