قاراعاندى وبلىسىنىڭ اقتوعاي اۋدانىندا كوروناۆيرۋس تىركەلگەن جوق

قاراعاندى. قازاقپارات - قاراعاندى وبلىسىنىڭ اقتوعاي اۋدانىندا كوروناۆيرۋس ينفەكتسياسىن جۇقتىرۋدىڭ بىردە-ءبىر جاعدايى تىركەلگەن جوق.

دەگەنمەن، اۋدان اكىمى سالتانات ابەۋوۆا تۇرعىندارعا بوساڭسۋعا بولمايتىنىن، سونداي-اق سانيتارلىق ەرەجەلەردى ۇستانۋ قاجەتتىگىن اتاپ ءوتتى، دەپ حابارلايدى قازاقپارات ءتىلشىسى.

اقتوعاي اۋدانىنىڭ اكىمى سالتانات ابەۋوۆا ZOOM پلاتفورماسىنداعى ونلاين-كونفەرەنتسيادا وزىنە سەنىپ تاپسىرىلعان اۋماقتاعى ەپيدجاعداي تۋرالى جانە جۇمىسپەن قامتۋ جول كارتاسى اياسىندا جۇزەگە اسىرىلىپ جاتقان جوبالار تۋرالى ايتىپ بەردى.

«ءبىزدىڭ اۋداندا كوروناۆيرۋس ينفەكتسياسىن جۇقتىرعاندار جوق. ءبىراق بۇعان قاراماستان، سانيتارلىق قاۋىپسىزدىك بويىنشا بارلىق شارالار قابىلدانۋدا. الەۋمەتتىك-مادەني ورتالىقتار مەن مەكەمەلەر قاشىقتان جۇمىس ىستەيدى. مەملەكەتتىك مەكەمەلەردە، كاسىپورىندار مەن نىسانداردا قىزمەت كورسەتۋ بارىسىندا سانيتارلىق تالاپتار كۇشەيتىلگەن. سانيتارلىق-ەپيدەميولوگيالىق تالاپتاردىڭ ساقتالۋىن باقىلاۋ ءۇشىن ءتورت موبيلدى توپ جۇمىس ىستەيدى»، - دەدى سالتانات ابەۋوۆا.

اقتوعاي اۋدانى باسشىسىنىڭ ايتۋىنشا، ورتالىق اۋرۋحانانىڭ جۇقپالى اۋرۋلار بولىمىندە كۆيمەن اۋىراتىندارعا 9 توسەك، 26 كارانتيندىك جانە 66 تاۋلىك بويى جۇمىس ىستەيتىن ورىندار دايىندالدى، سونداي-اق قاجەتتى ءدارى-دارمەك قورى بار.

بۇدان بولەك، ول جۇمىسپەن قامتۋ جول كارتاسى بويىنشا جۇزەگە اسىرىلىپ جاتقان جوبالار تۋرالى ايتىپ ءوتتى.

اۋداندا جالپى قۇنى 850 ميلليون 203 مىڭ تەڭگەنى قۇرايتىن 43 جوبا بويىنشا جۇمىس جۇرگىزۋ جوسپارلانۋدا.

«بۇل رەتتە كوشەنى جارىقتاندىرۋ، سونداي-اق بارلىق 16 اۋىلدىق وكرۋگتەردەگى جولداردى جوندەۋ جۇمىستارى قاراستىرىلعان. مەكتەپتەردە جوندەۋ جۇمىستارى جۇرگىزىلۋدە. جۇمىسپەن قامتۋ جول كارتاسى بويىنشا سارىشاعان جانە شاشۋباي كەنتتەرىندەگى سۋ، جىلۋ جانە كارىز جۇيەلەرى جوندەلۋدە. قازىر 12 جوبا بويىنشا جۇمىستار جۇرگىزىلۋدە»، - دەپ ءتۇسىندىردى اقتوعاي اۋدانىنىڭ اكىمى.

جۇمىسپەن قامتۋدىڭ جول كارتاسى بويىنشا كوزدەلگەن جوسپارلاردى جۇزەگە اسىرۋ ءۇشىن 220 جۇمىس ورنى قۇرىلادى، ونىڭ ىشىندە 112 ادام جۇمىسپەن قامتۋ ورتالىقتارى ارقىلى تارتىلادى. اۋداندا «اۋىل - ەل بەسىگى» باعدارلاماسى دا بەلسەندى جۇمىس ىستەيدى، ول ەكى كەزەڭدە جۇزەگە اسىرىلادى.

«ءبىرىنشى كەزەڭ شەڭبەرىندە بەلگىلەنگەن جۇمىستار اقتوعاي جانە شاشۋباي اۋىلدارىندا جۇرگىزىلۋدە. شاشۋبايداعى وتباسىلىق-دارىگەرلىك امبۋلاتوريا اياقتالۋعا جاقىن. ەكى مەديتسينالىق جوبانىڭ ءبىرى اقتوعاي اۋىلىندا جۇزەگە اسىرىلۋدا - مۇندا اۋرۋحانانىڭ جانىندا جاس ماماندارعا ارنالعان عيمارات جوندەلۋدە. سونداي-اق، جول جوندەۋ جۇمىستارى جۇرگىزىلىپ جاتىر - اقتوعاي كەنتىندە بۇل جۇمىستار وسى ايدىڭ سوڭىنا دەيىن اياقتالادى»، - دەپ سالتانات ابەۋوۆا «اۋىل - ەل بەسىگى» باعدارلاماسى اياسىنداعى جۇمىستارمەن تانىستىردى.

جۇمىستىڭ ەكىنشى كەزەڭى بويىنشا بارلىق كونكۋرستىق راسىمدەر جۇرگىزىلدى، دەپ اتاپ ءوتتى اقتوعاي اۋدانىنىڭ اكىمى.

مىسالى، شاشۋباي اۋىلىنداعى مادەنيەت ءۇيىنىڭ قۇرىلىسىنا كونكۋرس اياقتالدى، مەردىگەر انىقتالدى. سونىمەن قاتار، اۋداننىڭ ورتالىق ساياباعى بويىنشا كونكۋرستىق ءراسىم اياقتالدى.

س. ابەۋوۆا سونداي-ق بارلىق جۇمىستار ءتيىستى باقىلاۋدا ەكەنىن جانە ولاردى بەلگىلەنگەن مەرزىمدە اياقتاۋ جوسپارلانىپ وتىرعانىن اتاپ ءوتتى.