ەۋروپا وداعى قازاق تىلىندە «ەۋروپا الەمىندە» اتتى ەرتەگى كىتابىن جارىققا شىعاردى

نۇر- سۇلتان. قازاقپارات - قازاقستانداعى ەۋروپالىق وداق وكىلدىگى تۇڭعىش رەت «ەۋروپا الەمىندە» اتتى ەرتەگىلەر جيناعىن قازاق تىلىندە جارىققا شىعاردى، دەپ حابارلايدى قازاقپارات.

كىتاپتا ەۋروپانىڭ مادەني مۇراسىنىڭ ءبىرىڭعاي توپتاماسى رەتىندە ەۋروپالىق وداق ەلدەرىنىڭ اڭىزدارى مەن باسقا دا ءداستۇرلى ەرتەگىلەرى جيناقتالعان.

كىتاپتىڭ ماقساتى - ەۋروپا حالىقتارىنىڭ تاڭعاجايىپ حالىق داستۇرلەرىنىڭ ورتاق نەگىزىن تابۋ، سونىمەن بىرگە ەسكى قۇرلىقتىڭ قۇندىلىقتارىنىڭ بىرلىگىن كورسەتۋ. كىتاپتا ەۋروپالىق وداققا مۇشە 27 ەلدىڭ ءارقايسىسىنىڭ حالىق ەرتەگىلەرى، اڭىزدارى، ءارى ناقىل سوزدەرى كەلتىرىلگەن، سول ارقىلى ولار ورتاق ەجەلدەن كەلە جاتقان مادەني ساباقتاستىعىن كورسەتەدى. جيناقتاعى كەيبىر اسا سيرەك كەزدەسەتىن ەرتەگىلەر قازاق تىلىندە تۇڭعىش رەت جاريالانىپ وتىر. اتالمىش كىتاپتا باتىرلار، ايداھارلار، پەرىلەر تۋرالى نە حالىق ءازىل - سىقاعىنا تولى ءتۇرلى حيكايالاردى كەزدەستىرۋگە بولادى.

«قازاقستاندىق وقىرماننىڭ باسىم كوپشىلىگى وسى ەرتەگىلەرمەن تانىس ەكەنىنە سەنىمدىمىن. مادەنيەت شەكارا تالعامايدى، قۇرلىقتارعا، كەيدە ودان دا تىس ايماقتارعا ءورىس جايادى. سول سەبەپتى ءبىزدىڭ ۇقساستىعىمىز ءبىز ويلاعاننان دا كوبىرەك. بۇل كىتاپتىڭ ماقساتى - وسى بايلانىستى كورسەتۋ»، - دەيدى ەۋروپالىق وداق ەلشىسى سۆەن- ولوۆ كارلسسون.

كىتاپ بويىنشا جۇمىس جارتى جىل جۇرگىزىلدى. بارلىق يلليۋستراتسيانى قازاقستان سۋرەتشىلەر وداعىنىڭ مۇشەلەرى، دارىندى اپالى- ءسىڭىلى عاليا جانە بالقيا قۇسايىنوۆالار سالدى.

«ەۋروپا الەمىن بەينەلەيتىن سۋرەتتەر ارقىلى وقىرماندار ەرتەگى كەيىپكەرلەرىمەن جۇزدەسىپ، سول زاماننىڭ سيقىر مەن قيال الەمىنە جول اشادى دەپ ۇمىتتەنەمىز»، - دەپ اتاپ ءوتتى عاليا جانە بالقيا قۇسايىنوۆالار.

كىتاپتىڭ تۇساۋكەسەرىنە ارنايى قازاقستانداعى ەۋروپالىق وداق وكىلدىگى ونلاين ناۋقانىن جاريالادى. كۇندەلىكتى وكىلدىكتىڭ الەۋمەتتىك جەلى پاراقشالارىندا ەو- عا مۇشە مەملەكەتتەردىڭ ەلشىلەرى بەينەروليك فورماتىندا ەرتەگىلەردى وقىپ، ەۋروپانىڭ عاجايىپ ەرتەگىلەر الەمىنە وقىرمانداردى ساياحاتتاۋعا شاقىرادى. «ەۋروپا الەمىندە» ەرتەگىلەر كىتابىنىڭ ەلەكتروندى نۇسقاسىن مىنا سىلتەمەگە كىرىپ، وقي الاسىز.