اقمولا وبلىسىندا ەرتە تەمىر داۋىرىندەگى قىلىش تابىلدى
اقمولا وبلىسى مادەنيەت، ارحيۆتەر مەن قۇجاتتامالار باسقارماسىنىڭ جانىنداعى تاريحي-مادەني مۇرانى قورعاۋ جانە پايدالانۋ ورتالىعى ديرەكتورىنىڭ مىندەتىن اتقارۋشى سەرىك ىسقاقوۆتىڭ ايتۋىنشا، 2020-جىلدىڭ ماۋسىم ايىندا جوسپارعا ساي جاڭا ارحەولوگيالىق وبەكتىلەردى انىقتاۋ ماقساتىندا اتباسار اۋدانىندا بارلاۋ جۇمىستارىن جۇرگىزدى.
«بارلاۋ جۇمىستارى كەزىندە اتباسار اۋدانىندا 100 دەن اسا ارحەولوگيالىق نىساندار ورنالاسقان، ارحەولوگيالىق بارلاۋ جۇمىستارىنىڭ ارقاسىندا قولا جانە ەرتە تەمىر داۋىرىنە جاتاتىن تاعى 20 عا جۋىق جاڭا ارحەولوگيالىق ەسكەرتكىشتەر انىقتالدى. ەسكەرتكىشتەردى ۆيزۋالدى قاراۋ كەزىندە قورعاننىڭ ورتاسىندا تەمىر سۇقپانىڭ ۇشى بايقالدى، ءارى قاراي قازبا كەزىندە 0,30 سانتيمەتر تەرەڭدىكتە تەمىر قىلىش تابىلدى. قىلىشتىڭ جالپى ۇزىندىعى 79 سانتيمەتر. تۇتقاسىنىڭ ۇزىندىعى 6,5 سانتيمەتر ، قالىڭدىعى 0,4 - 0,8 سانتيمەتر ، ەنى 0,7 - 2,8 سانتيمەتر. قىلىشتىڭ ۇشى 14 سانتيمەتر، ەكى جاعى دا ۇشتالعان، سۇقپاسى 58 سانتيمەتر، ءبىر جاعى ۇشتالعان، ءۇستى توت باسقان، ساقتالۋى ورتاشا.
تۇسپاسى مەن سۇقپا تۇسىندا ۇزىندىعى 11,5 سانتيمەتر، قالىڭدىعى 0,1 - 2 سانتيمەتر، ەنى 0,5 - 1 سانتيمەتر، تىرەۋىش بەكىتىلگەن.
قىلىشتىڭ ورتاڭعى جانە ۇشى مايىسقان، بالكىم اۋىر تاستاردىڭ سالماعىنان بولار. قىلىشتىڭ ءپىشىنى مەن انىقتالعان ورنىنا قاراعاندا، سولتۇستىك قازاقستان جەرىن ەرتە تەمىر ءداۋىرىن مەكەندەگەن تايپالاردىڭ ءداستۇرىن سيپاتتايدى»، - دەيدى سەرىك ىسقاقوۆ.
وسى رەتتە، ورتالىق باسشىسى اتاپ وتكەندەي، ماگدالينوۆكا V قورىمى ماگدالينوۆكا اۋىلىنان باتىسقا قاراي 1,3 كيلومەتر، ەسىل وزەنىنىڭ سول جاعالاۋىنان 300 مەتر جەردەگى بيىك قىردىڭ ۇستىندە ورنالاسقان.
قورىم العاش رەت 1992-جىلى انىقتالىپ، 2006-جىلى ا. ا. پلەشاكوۆتىڭ جەتەكشىلىگىمەن قايتا زەرتتەلگەن. 2020-جىلى اقمولا وبلىسى مادەنيەت، ارحيۆتەر مەن قۇجاتتامالار باسقارماسى «تاريحي- مادەني مۇرانى قورعاۋ جانە پايدالانۋ ورتالىعى» ك م م- مەن اتباسار اۋدانىنىدا جاڭا ارحەولوگيالىق وبەكتىلەردى انىقتاۋ ماقساتىندا بارلاۋ جۇمىستار كەزىندە قايتا زەرتتەلدى.