الماتىنىڭ ورتالىق كوشەلەرى دەمالىس كۇندەرى جاياۋ جۇرگىنشىلەر جولىنا اينالادى

الماتى. قازاقپارات - الماتىنىڭ ورتالىق كوشەلەرى دەمالىس كۇندەرى جاياۋ جۇرگىنشىلەر جولىنا اينالادى، دەپ حابارلايدى قازاقپارات ءتىلشىسى.

باقىتجان ساعىنتايەۆ Twitter- دەگى پاراقشاسىندا ەپيدەميولوگيالىق جاعداي تۇراقتانعان سوڭ ۋاقىتشا جاياۋ جۇرگىنشى ايماقتارىن قۇرۋ جونىندەگى پيلوتتى جوبانىڭ قولعا الىناتىنىن حابارلادى. ءبىرىنشى كەزەڭدە المالى اۋدانىنىڭ بەس كوشەسى ءار جەكسەنبى سايىن ءبىر كۇنگە جابىلادى. جوبا ەپيدەميولوگيالىق جاعداي تۇراقتانعان سوڭ عانا باستالادى.

«ۋاقىتشا جاياۋ جۇرگىنشىلەر ايماعىن قۇرۋ ءۇشىن دەمالىس كۇندەرى ءبىرقاتار كوشەنى جابۋدى ساراپشىلارمەن تالقىلادىق. ءبىرىنشى كەزەڭدە قابانباي باتىر — گوگول — نازاربايەۆ — ابىلاي حان داڭعىلىنداعى شارشى ايماق ۇسىنىلدى. جۇمىستى قالاداعى ەپيدەميولوگيالىق جاعداي تۇراقتانعاننان كەيىن باستايمىز»، - دەپ جازدى الماتى اكىمى.

ياعني، قابانباي باتىر جانە گوگول كوشەلەرىنىڭ اراسىنداعى پانفيلوۆ كوشەسى، سونىمەن قاتار نازاربايەۆ جانە ابىلاي حان داڭعىلدارى اراسىنداعى بوگەنباي باتىر، تولە ءبي، قازىبەك ءبي، ايتەكە ءبي كوشەلەرى ۋاقىتشا جاياۋ جۇرگىنشىلەر ايماقتارىنا اينالاتىن بولادى.

قوعامدىق كولىكتەر مەن ارنايى ماشينالاردىڭ جۇرۋىنە رۇقسات بەرىلەدى. باستى ماقسات - كولىك جۇكتەمەسىن ازايتۋ. ال قالانىڭ باسقا اۋداندارىندا جەكسەنبى كۇنى ءبىر عانا كوشە جابىلادى.

ساراپشىلار قوعامداستىعى مەگاپوليستىڭ ەكولوگيالىق احۋالىن جاقسارتۋدىڭ ءبىرقاتار شارالارىن قاراستىرۋدا.

اتاپ ايتساق، جۇك كولىگى مەن موتوتسيكلدەردىڭ قوزعالىسىنا زەرتتەۋ جۇرگىزىلەدى. بۇل ماڭىزدى ىسكە كولىك، ەكولوگيا، ۋربانيستيكا، قالا قۇرىلىسى سالالارىنىڭ ماماندارى تارتىلادى. ولار ەكولوگيالىق احۋالدى جاقسارتۋ بويىنشا كەشەندى شارالاردى ۇسىنۋ ءۇشىن قالانىڭ كولىك جۇكتەمەسىن، زالالدى جانە دىبىستىق زاتتاردىڭ تارالۋ دەڭگەيىن جان-جاقتى زەرتتەپ، وزدەرىنىڭ باعالارىن بەرەتىن بولادى.