قازاقستان مەكتەپتەرىندە ۇ ب ت باستالدى
بيىلعى تەستىلەۋدىڭ ەرەكشەلىگى - سانيتارلىق تالاپتاردىڭ كۇشەيتىلۋى بولماق. عيماراتقا كىرەردە تەست تاپسىرۋشىلار اراسىندا ەكى مەترلىك اراقاشىقتىقتى قاتاڭ ساقتاۋ مەن ماسكالى رەجيم جۇزەگە اسىرىلادى. تالاپكەرلەر دەزينفەكتسيالاۋدىڭ 5 ءتۇرلى كەزەڭىنەن وتەدى.
ۇ ب ت وتكىزىلەتىن بارلىق ورىندار تەپلوۆيزورمەن، دەزينفەكتسيالىق توننەلمەن، اياق كيىمدى زارارسىزداندىرۋعا ارنالعان كىلەمشەمەن، مەديتسينالىق بەكەتپەن، سانيتايزەرمەن جانە قورعانىس ماسكالارىمەن قامتاماسىز ەتىلەدى.
بيىلعى تەستىلەۋگە قاتىسۋعا رەكوردتىق كولەمدە - 131755 ءوتىنىش قابىلدانعان. العاشقى كۇنى ۇ ب ت- نى 6,5 مىڭ ادام تاپسىرادى. ءبىر اۋديتوريادا ورتا ەسەپپەن 18 ادام عانا بولادى. وسىلايشا، اۋديتوريا تەك %35 دەيىن تولتىرىلادى.
ۇ ب ت تاپسىرۋ ءۇشىن تۇلەكتەردەن پ ت ر- تەستىلەۋدەن وتكەنى تۋرالى ەش انىقتاما تالاپ ەتىلمەيدى. تالاپكەرلەر تەك ماسكا تاعىپ كەلۋى ءتيىس. سونىمەن بىرگە، ۇ ب ت وتكىزەتىن ءار پۋنكتتە كەزەكشى اۋديتوريا بولادى. كوروناۆيرۋس ينفەكتسياسىن جۇقتىرعان بالالار سول كابينەتتە، جالپى اۋديتوريادان بولەك تەست تاپسىرا الادى.
جالپى، ۇلتتىق ءبىرىڭعاي تەستىلەۋدى وتكىزۋ ءتارتىبى بۇرىنعى فورماتتا قالدى. بۇدان بىلاي تالاپكەرلەرگە كالكۋلياتور بەرىلەتىن بولادى. سونىمەن قاتار تەستىلەۋ ۋاقىتى دا ءبىرشاما ۇزارتىلدى. اتا-انالار مەن تۇلەكتەردىڭ سۇراۋىمەن تەستىلەۋ ۋاقىتى تاعى 10 مينۋتقا ۇزارىپ، ۇ ب ت 4 ساعات وتەتىن بولدى.
عيماراتقا كىرگىزۋ بارىسىندا جانە اۋديتوريادا تىيىم سالىنعان زاتپەن ۇستالعان تۇلەك تەستىلەۋگە جىبەرىلمەيدى جانە بيىل ۇ ب ت تاپسىرۋ مۇمكىندىگىنەن ايرىلادى. كارانتين شارالارىنا بايلانىستى تاعى ءبىر ەسكەرەر جايت، اتا-انالارعا جانە تۇلەكتەردى الىپ ءجۇرۋشى باسقا ادامدارعا بالالاردى ۇ ب ت وتكىزۋ پۋنكتتەرىندە كۇتۋگە تىيىم سالىنادى.
اتا-انالار ۇ ب ت ءوتۋ بارىسىن ۇيىندە وتىرىپ، ونلاين كورە الادى. بۇل ءۇشىن ءاربىر اۋديتوريادان ترانسلياتسيا قامتاماسىز ەتىلەدى. تەست تاپسىرۋ وتەتىن عيمارات اۋماعىن قۇقىق قورعاۋ ورگاندارى كۇزەتەدى.
وسى ورايدا، ونلاين كورسەتىلىم سىلتەمەلەرى مەن رەسۋرستار ۇلتتىق تەستىلەۋ ورتالىعىنىڭ سايتىندا ءارى الەۋمەتتىك جەلىلەردە جاريالاناتىنا ۋادە ەتىلگەن بولاتىن. بارلىق بەينەجازبالارعا 25- تامىزعا دەيىن تالداۋ جۇرگىزىلەدى.
ۇ ب ت وتكىزۋ قاعيدالارىنىڭ بۇزىلۋى انىقتالعان جاعدايدا، ياعني كوشىرۋ نەمەسە باسقا دا ارەكەتتەر بايقالسا، تەستىلەۋ ناتيجەلەرى جويىلادى. سونىمەن قاتار، ءبىلىم بەرۋ گرانتىن تاعايىنداۋ كونكۋرسىنىڭ ناتيجەلەرى دە جويىلۋى مۇمكىن.
ۇ ب ت- دان كەيىن ءبىلىم گرانتىن تاعايىنداۋ كونكۋرسىنا قاتىسۋ ءۇشىن نەمەسە اقىلى نەگىزدە ءبىلىم الۋ باعىتىندا ۇلتتىق جوعارى وقۋ ورىندارىنا كەمىندە 65 بال، ال باسقا جوعارى نەمەسە جوعارى وقۋ ورنىنان كەيىنگى ءبىلىم ۇيىمدارىنا كەمىندە 50 بال جيناۋ كەرەك.
وعان قوسا، «اۋىل شارۋاشىلىعى جانە بيورەسۋرستار»، «ۆەتەريناريا» ءبىلىم سالالارى بويىنشا كەمىندە 60 بال، «پەداگوگيكا عىلىمدارى» سالاسى بويىنشا كەمىندە 70 بال بولۋى ءتيىس. ال «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» سالاسىنا كەم دەگەندە 65 بال قاجەت.