ق ح ر ءتوراعاسى شي جينپيڭ ەلباسى نۇرسۇلتان نازاربايەۆتىڭ اتىنا تەلەگرامما جولدادى

None
None
نۇر-سۇلتان. قازاقپارات - قىتاي حالىق رەسپۋبليكاسىنىڭ ءتوراعاسى شي جينپيڭ ەلباسى نۇرسۇلتان نازاربايەۆتىڭ اتىنا تەلەگرامما جولدادى.

قازاقپارات بۇل تۋرالى ق ر تۇڭعىش پرەزيدەنتىنىڭ رەسمي سايتىنا سىلتەمە جاساپ حابارلايدى.

شي جينپيڭ نۇرسۇلتان نازاربايەۆتىڭ كوروناۆيرۋس جۇقتىرۋىنا بايلانىستى الاڭداۋشىلىق ءبىلدىردى.

«كوروناۆيرۋس ينفەكتسياسى ءورشي باستاعان ساتتەن قىتاي مەن قازاقستان ەپيدەمياعا قارسى جەمىستى ىنتىماقتاستىق جۇرگىزىپ كەلەدى. بۇل قىتاي-قازاقستان قاتىناستارىنىڭ ماڭگىلىك جان-جاقتى ستراتەگيالىق سەرىكتەستىگىنىڭ جوعارى دەڭگەيى مەن ەرەكشە سيپاتىن كورسەتىپ وتىر. سونداي-اق حالىقارالىق قاۋىمداستىق ءۇشىن پاندەمياعا قارسى بىرلەسىپ ارەكەت ەتۋدىڭ جارقىن ۇلگىسىنە اينالدى. ەپيدەميانى جەڭەتىنىمىزگە كامىل سەنىمدىمىن. ال ەكىجاقتى قاتىناس بۇدان دا ناتيجەلى دامي تۇسەدى دەگەن ويدامىن. مەن سىزبەن قالىپتاسقان جاقىن دوستىق قارىم-قاتىناستى ەرەكشە باعالايمىن جانە شىن جۇرەكتەن تەزىرەك ساۋىعىپ كەتۋىڭىزدى تىلەيمىن»، - دەلىنگەن جەدەلحاتتا.

ەلباسى نۇرسۇلتان نازاربايەۆتىڭ COVID-19-عا تاپسىرعان سىناماسى وڭ ناتيجە كورسەتكەنى بۇعان دەيىن حابارلانعان بولاتىن. ەلباسىنىڭ باسپا ءسوز حاتشىسى ايدوس ۇكىباي تۇڭعىش پرەزيدەنتتىڭ دەنساۋلىعىنا قاتىستى الاڭداۋعا نەگىز جوق ەكەنىن ايتتى. سونداي-اق ول قازاقستاندىقتاردىڭ بىرلىگى، ولاردىڭ ىزگى جانە شىن كوڭىلدەن بىلدىرگەن تىلەكتەرى نۇرسۇلتان نازاربايەۆقا كۇش بەرەتىنىن جانە ەلباسى وزىنە جازىلعان حاتتار مەن تەلەگراممالاردى وقىپ شىعاتىنىن جەتكىزدى.

بۇعان دەيىن رەسەي پرەزيدەنتى ۆلاديمير پۋتين تۇڭعىش پرەزيدەنتكە حات جولداپ، تەلەفون ارقىلى دا سويلەسكەن بولاتىن. سونداي-اق تۇركيا پرەزيدەنتى رەجەپ ەردوعان، ا ق ش مەملەكەتتىك حاتشىسى مايك پومپەو، تاجىكستان مەن يزرايل باسشىلارى، ءۇندىستاننىڭ پرەمەر-ءمينيسترى نارەندرا مودي حابارلاسىپ، ىزگى تىلەكتەرىن ءبىلدىردى. سونىمەن بىرگە، نۇرسۇلتان نازاربايەۆتىڭ اتىنا ونەر جانە قوعام قايراتكەرلەرىنەن، ج و و رەكتورلارىنان، دەپۋتاتتاردان، كوپتەگەن ەڭبەك ۇجىمدارىنان تەلەگراممالار ءتۇسىپ جاتىر.

سوڭعى جاڭالىقتار