جانداربەك بەكشين الماتىدا كارانتيننىڭ كۇشەيتىلۋىن ءتۇسىندىردى

الماتى. قازاقپارات - الماتى قالاسى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى - قالانىڭ باس مەملەكەتتىك سانيتارلىق دارىگەرى جانداربەك بەكشين ەنگىزىلگەن قوسىمشا شارالاردىڭ قاجەتتىگىن ءتۇسىندىردى، دەپ حابارلايدى قازاقپارات.

بۇگىنگى تاڭدا الماتىدا كوروناۆيرۋس ينفەكتسياسىن جۇقتىرۋدىڭ 3292 وقيعاسى تىركەلدى. ال سوڭعى ەكى اپتادا قالادا ناۋقاستار سانى ەكى ەسە ارتتى. وسىعان وراي، قوسىمشا كارانتيندىك شارالار قابىلداندى.

«كوروناۆيرۋستى جۇقتىرۋدىڭ نەگىزگى ورىندارى ادامدار كوپ جينالاتىن ورىندار مەن قوعامدىق كولىكتەر ەكەنى جاسىرىن ەمەس. ول جەرلەردە ادامنان ادامعا تىعىز قارىم-قاتىناس جولىمەن جۇعادى جانە ودان ءىس جۇزىندە قاشىپ قۇتىلۋ مۇمكىن ەمەس. مىنە، سول سەبەپتى وسى دەمالىس كۇندەرى قوعامدىق ورىندارعا بارۋعا شەكتەۋ قويۋ جانە سول جەرلەردە جاپپاي دەزينفەكتسيا جۇرگىزۋ شەشىمى قابىلداندى. دەزينفەكتسيا - كوروناۆيرۋستى الدىن الۋدىڭ نەگىزى بولىپ تابىلاتىنىن جانە وسى ۇعىمعا جەكە گيگيەنانى ساقتاۋ، قولدى ءجيى جۋۋ، ۇيدە دەزينفەكتسيالىق قۇرالداردىڭ كومەگىمەن ىلعالدى تازالىق جۇرگىزۋ جانە بولمەلەردى جەلدەتىپ وتىرۋ سىندى تالاپتار ەنەدى»، - دەپ ءتۇسىندىردى جانداربەك بەكشين.

ول سونىمەن بىرگە، وسىعان دەيىن ەنگىزىلگەن شەكتەۋ شارالارى ساقتالاتىنىن اتاپ ءوتتى.

ەسكە سالايىق، اۋرۋدىڭ الدىن الۋدىڭ كەلەسى شارالارىن جالعاستىرۋ قاجەت:

- كوشەدەن كەلگەننەن كەيىن، ادامدارمەن بايلانىس جاساعاننان كەيىن قولدى سابىنمەن مۇقيات جۋۋ؛

- امانداسۋ كەزىندە قۇشاقتاسىپ، قول الىسپاۋ؛

- قوعامدىق ورىنداردا بىررەتتىك مەديتسينالىق ماسكالاردى ءاربىر 2-3 ساعات سايىن اۋىستىرۋ؛

- قوعامدىق ورىندارعا بارۋدان اۋلاق بولۋ (س و و، سپورتتىق جانە ويىن-ساۋىقتىق شارالار، قاربالاس كەزدە قوعامدىق كولىكتەرگە مىنبەۋ)؛

- كوروناۆيرۋس بەلگىلەرى بار ادامدارمەن ءبىر بولمەدە قالۋدان جانە جاقىن بايلانىس جاساۋدان اۋلاق بولۋ؛

- قولمەن ۇستاعان گادجەتتەردى، ورگتەحنيكانى جانە كەز كەلگەن زاتتىڭ ۇستىڭگى بەتىن دەزينفەكتسيالاۋ.

COVID-19-عا كۇدىكتەنگەن جاعدايدا دەرەۋ وقشاۋلانىپ، ماسكا تاعىپ، ونى ءاربىر ءۇش ساعات سايىن اۋىستىرۋ كەرەك. جاعدايى ناشارلاپ، دەنە قىزۋى كوتەرىلسە ەمحاناعا حابارلاسىپ، ءوزىنىڭ جاعدايى مەن شاعىمدارى تۋرالى ايتىپ، دارىگەرلەردىڭ نۇسقاۋلىعىن قاتاڭ ۇستانۋ قاجەت. سونىمەن بىرگە ادامدارمەن بايلانىستى ازايتۋ كەرەك.

اسىرەسە جۇقتىرۋ بەلگىلەرى بولسا، جوتەلىپ، تۇشكىرگەن كەزدە اۋىزدى جابۋ ءۇشىن بىررەتتىك سالفەتكالاردى پايدالانعان ءجون. بولمەدە ىلعالدى تازالىقتى دەزينفەكتسيالىق قۇرالداردىڭ كومەگىمەن جۇرگىزىپ، ءجيى جەلدەتىپ وتىرۋ كەرەك. سۇراقتار بولعان جاعدايدا الماتى تۇرعىندارى 1406 نەمەسە 1308 نومەرلەرى بويىنشا حابارلاسا الادى (OpenAlmaty).

بۇعان دەيىن ج. بەكشين الماتىدا زەرتحانالار كوروناۆيرۋسقا تەستىلەۋدى نەلىكتەن توقتاتقانىن ءمالىم ەتكەن بولاتىن. وسى كۇندەرى قالادا سانيتارلىق نورمانى ساقتاماعان 300 دەن استام نىسان جابىلدى. قوسىمشا شەكتەۋ شارالارىنا بايلانىستى پوليتسيا قىزمەتكەرلەرى قوعامدىق ورىندارعا باقىلاۋدى كۇشەيتتى. كەشە ساعات 08.00-دەن باستاپ الماتى كوشەلەرىندە جاپپاي دەزينفەكتسيا شارالارى باستالدى.