استانادا كارانتين تالاپتارىن بۇزعاندار كوشە ۆيدەوكامەرالارىمەن انىقتالۋدا

None
None
نۇر-سۇلتان. قازاقپارات - سەنبى، جەكسەنبى كۇندەرى نۇر-سۇلتان قالاسىندا كۇشەيتىلگەن كارانتين تالاپتارىن بۇزعان تۇرعىندار كوشە ۆيدەوكامەرالارى ارقىلى انىقتالىپ وتىرادى، دەپ حابارلايدى قازاقپارات.

قازاقستاننىڭ ءبىرقاتار وڭىرىندە ەپيدەميولوگيالىق احۋالدىڭ كۇردەلەنۋىنە جانە كوروناۆيرۋس ينفەكتسياسىنا شالدىققاندار سانىنىڭ ارتۋىنا بايلانىستى ۇكىمەت جانىنداعى ۆەدومستۆوارالىق كوميسسيا 20-21- ماۋسىم كۇندەرى قوسىمشا شەكتەۋ شارالارىن ەنگىزگەن بولاتىن.

وسىلايشا، نۇر-سۇلتان قالاسىندا دەمالىس كۇندەرى بارلىق ساۋدا، ويىن-ساۋىق-ورتالىقتارىنىڭ، ساۋدا ۇيلەرىنىڭ، جەلىلىك دۇكەندەردىڭ، جابىق ازىق-تۇلىك جانە ازىق-تۇلىك ەمەس بازارلارىنىڭ، دۇكەندەردىڭ جۇمىسى توقتاتىلدى. جاقىن ماڭداعى ازىق-تۇلىك دۇكەنىنە، مەديتسينالىق قىزمەت الۋعا بارۋدى قوسپاعاندا، ازاماتتاردىڭ ۇيدەن شىعۋىنا شەكتەۋ قويىلعان.

قالا تۇرعىندارى قىزمەتىنە رۇقسات ەتىلگەن نىساندارعا جۇمىسقا بارىپ-كەلۋىنە بولادى. پوليتسيا دەپارتامەنتىنەن ءمالىم ەتكەندەي، سەنبى-جەكسەنبى كۇندەرى پوليتسەيلەردىڭ قىزمەتى كۇشەيتىلگەن رەجيمگە كوشىرىلدى.

نۇر-سۇلتان قالاسى بويىنشا باس سانيتارلىق دارىگەر تالاپتارىنىڭ ساقتالۋىنا مونيتورينگ ۇزدىكسىز جاسالۋدا. سونىمەن قاتار بۇل جۇمىستارعا iKOMEK مونيتورينگ جانە جەدەل ارەكەت ەتۋ ورتالىعى جۇمىلدىرىلعان. iKOMEK- كە ينتەگراتسيالانعان قالالىق ۆيدەوباقىلاۋ كامەرالارىنىڭ كومەگىمەن تۇرعىن ءۇي اۋلالارىنا، ساياباقتارعا، سكۆەرلەر مەن باسقا دا قوعامدىق ورىندارعا مونيتورينگ جاسالىپ، كارانتين تالاپتارىن بۇزۋشىلار انىقتالىپ جاتىر.

تىركەلگەن دەرەكتەر جەدەل تۇردە پوليتسيا دەپارتامەنتىنە جولدانۋدا. ءوز كەزەگىندە ءتارتىپ ساقشىلارى ەلوردا تۇرعىندارى مەن قوناقتارىنا ءتۇسىندىرۋ جۇمىستارىن جۇرگىزەدى.

«ەنگىزىلىپ وتىرعان شەكتەۋ شارالارى ەپيدەميولوگيالىق احۋالدى جاقسارتىپ، كوروناۆيرۋس ينفەكتسياسىنىڭ تارالۋىن باسەڭدەتۋگە باعىتتالعانىن ايتىپ وتكەن ءجون. قالانىڭ بارلىق تۇرعىندارى مەن قوناقتارىن الەۋمەتتىك جاۋاپكەرشىلىك تانىتىپ، اسقان قاجەتتىلىكسىز ۇيدەن شىقپاۋعا جانە سانيتارلىق نورمالاردى ساقتاۋعا شاقىرامىز»، - دەلىنگەن پ د اقپاراتىندا.

سەنبى، جەكسەنبى كۇندەرى ەلوردادا دەزينفەكتسيا شارالارى جۇرگىزىلەدى. قالا اكىمى التاي كولگىنوۆ دۇيسەنبىدەن باستاپ كوروناۆيرۋس جۇقتىرعان ناۋقاستار ءۇشىن قوسىمشا 200 توسەك- ورىن دايىندالاتىنىن ايتتى.

ال جەدەل جاردەم قىزمەتكەرلەرىنىڭ جۇكتەمەسىن ازايتۋ ءۇشىن ءاربىر ەمحانادا كولل-ورتالىق جۇمىس ىستەيتىن بولادى.


سوڭعى جاڭالىقتار