ۆلاديمير پۋتين نۇرسۇلتان نازاربايەۆقا ساۋىعىپ كەتۋىن تىلەپ، جەدەلحات جولدادى

نۇر-سۇلتان. قازاقپارات - ۆلاديمير پۋتين نۇرسۇلتان نازاربايەۆقا جەدەلحات جولدادى، دەپ حابارلايدى تۇڭعىش پرەزيدەنتتىڭ باسپا ءسوز حاتشىسى ايدوس ۇكىباي Twitter- دەگى پاراقشاسىندا.

«ۆلاديمير پۋتين نۇرسۇلتان نازاربايەۆقا ونىڭ كوروناۆيرۋس ينفەكتسياسىن جۇقتىرعانى جونىندەگى حابارعا وراي قولداۋ ءبىلدىرىپ، جەدەلحات جولدادى» دەلىنگەن حابارلامادا.

رەسەي فەدەراتسياسىنىڭ پرەزيدەنتى ەلباسىنىڭ تەز ساۋىعىپ كەتۋىن تىلەگەن.

«وسى ءبىر قيىن ساتتە شىنايى تۇردە دوستىق كوڭىلمەن سىزگە قولداۋ تانىتقىم كەلەدى. ءسىزدىڭ ەشكىمگە ۇقسامايتىن ومىرلىك كۇش-قۋاتىڭىز، رۋحىڭىزدىڭ سەرگەكتىگى جانە وپتيميست بولمىسىڭىز بۇل ۆيرۋستى از ۋاقىتتىڭ ىشىندە جەڭىپ شىعۋعا مۇمكىندىك بەرەتىنىنە سەنىمدىمىن. شىن جۇرەكتەن ساۋىعىپ كەتۋىڭىزدى جانە ۇزاق عۇمىر تىلەيمىن» دەلىنگەن جەدەلحاتتا.

ايتا كەتەيىك، بۇعان دەيىن ەلباسى نۇرسۇلتان نازاربايەۆ كوروناۆيرۋسكە بايلانىستى وقشاۋلانعانى حابارلاندى.

ءبىراق جۇمىسىن قاشىقتان جالعاستىرۋدا.