اقمولا وبلىسىندا ەسكە الۋ اسىنا بارعان قوناقتار ىندەت جۇقتىرعان
ونىڭ 10 ى - كوكشەتاۋ قالاسىنىڭ ۇلەسىندە. وسىلايشا وبلىس بويىنشا كوروناۆيرۋسقا شالدىققاندار سانى 227 ادامعا جەتتى، دەپ حابارلايدى قازاقپارات ءتىلشىسى.
وبلىستىق تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى وسىنداي مالىمەت تاراتتى.
«قاۋىپتى ۆيرۋستى جۇقتىرعاندارعا كەلەتىن بولساق، كوكشەتاۋ قالاسىندا - 10 ادام، سەلينوگراد اۋدانىندا - 8 ادام، شورتاندى، ەرەيمەنتاۋ، بۇلاندى جانە ەگىندىكول اۋداندارىندا ءبىر ادامنان. ناۋقاستاردىڭ دەنى - 1962-1990-جىلدار ارالىعىنداعى 6 ەر ادام مەن 1950-1998-جىلدار ارالىعىنداعى 16 ايەل. بۇنىڭ تورتەۋى بۇرىن جۇقتىرعاندارمەن بايلانىستا بولعان ءتىزىم بويىنشا ءوتتى. ەگەر سانيتار دارىگەرلەردىڭ ۇسىنىمدارىنا قۇلاق اسسا، كوپ ادام ۆيرۋستان اۋلاق بولار ەدى» دەيدى ۆەدومستۆودان.
مەكەمەنىڭ باسپا ءسوز قىزمەتىنەن اتاپ وتكەندەي، كوروناۆيرۋس جۇقتىرعانداردىڭ باسىم كوپشىلىگى كوناققا بارعان. سونداي-اق، نۇر-سۇلتان جانە الماتى قالالارىنا جول ءجۇرۋ كەزىندە كارانتين شارالارى ساقتالماعانى سەبەپ بولىپ وتىر. سونىمەن بىرگە، وبلىس ورتالىعىنداعى «شالقار» ءدامحاناسىنا ەسكە الۋ اسىنا بارعاندار قاۋىپتى ۆيرۋستى جۇقتىرعان.
جاقىن جانە الەۋەتتى بايلانىستاردى انىقتاۋ بويىنشا سانيتارلىق- ەپيدەميولوگيالىق تەكسەرۋ تۇرعىلىقتى جەرى، جۇمىس ورنى جانە باسقا دا ىقتيمال بايلانىس ورىندارىندا وتەدى.
«وشاقتار انىقتالعاننان كەيىن قورىتىندى دەزينفەكتسيا جۇرگىزىلەدى. بارلىق ناۋقاستارعا بەكىتىلگەن كلينيكالىق حاتتاماعا سايكەس، مەديتسينالىق كومەك كورسەتىلەدى. جۇقتىرۋ وشاقتارىندا ىندەتكە قارسى ءىس-شارالاردى جوعارىدا اتالعان اۋماقتار باسقارمالارىنىڭ ماماندارى جۇرگىزەتىن بولادى» دەپ تولىقتىردى ۆەدومستۆودان.