قازاقستاندا ءرولى وڭ جاقتا ورنالاسقان كولىكتەرگە نەلىكتەن تىيىم سالىنعان - ءى ءى م جاۋابى

نۇر- سۇلتان. قازاقپارات - ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى سەرىك ءتۇسىپوۆ قازاقستاندا ءرولى وڭ جاقتا ورنالاسقان كولىكتەرگە نەلىكتەن تىيىم سالىنعانىن ءتۇسىندىرىپ بەردى، دەپ حابارلايدى قازاقپارات ءتىلشىسى.

«ارمەنيادان اكەلىنگەن كولىكتى تىركەۋ قۇنى - 11940 تەڭگە. وعان تىركەۋ جيناعى ءۇشىن قوسىلاتىن 695 تەڭگە، تەحنيكالىق قۇجات ءۇشىن 3473 تەڭگە، مەملەكەتتىك ءنومىر ءۇشىن 7778 تەڭگە تولەۋ كەرەك. اكەلىنگەن كولىكتەر ارمەنيانىڭ جاۋاپتى ورگاندارىنىڭ ەسەبىندە تۇرعاندىقتان ولاردى قازاقستانعا تىركەۋ كەزىندە ولارعا سارى ءتۇستى مەملەكەتتىك تىركەۋ ءنومىرى بەرىلەدى. مۇنداي نومىرلەر - باسقا مەملەكەتتە تۇراقتى تىركەۋى بار كولىكتەرگە بەرىلەدى. سونىمەن قاتار كولىك يەسىنىڭ تۇرىپ جاتقان وبلىستىڭ كودىمەن تاپسىرىلادى»، - دەدى ول و ك ق- دا «ق ر ازاماتتارى ارمەنيادان اكەلگەن اۆتوموبيلدەردى تىركەۋ تۋرالى» تاقىرىبىندا وتكەن باسپا ءسوز ءماسليحاتىندا.

ءى ءى م وكىلىنىڭ ايتۋىنشا، رۋلى وڭ جاقتاعى كولىكتەر تىركەلمەيدى. سەبەبى مۇنداي ساناتتاعى كولىكتەرگە قاتىستى شەكتەۋ قازاقستاندا 2009 -جىلدان بەرى بار.

«رۋلى وڭ جاقتا ورنالاسقان كولىكتەرگە تىيىم - جول ءجۇرۋ ەرەجەسى زاڭىمەن جانە كەدەندىك وداقتىڭ تەحنيكالىق رەگلامەنتىمەن رەتتەلەدى. بۇل تىيىم ارمەنيامەن بىرگە وزگە مەملەكەتتەردەن كەلەتىن كولىكتەرگە قاتىستى. ءرولى وڭ جاقتاعى كولىكتەر ءاۋ باستا جول ەرەكشەلىكتەرىنە بايلانىستى جاپونيا، ۇلى بريتانيا ەلدەرىندە رۇقسات ەتىلگەن. مۇنداي كولىكتەرمەن ءبىزدىڭ ەلدە ءجۇرۋ ىڭعايسىزدىق تۋىنداتادى. ماسەلەن، ونداي كولىكتەر الدىنداعى كولىكتەن وزعىسى كەلەتىن جاعدايدا جۇرگىزۋشى قارسى كەلە جاتقان كولىكتەردى بايقاماي قالۋى مۇمكىن»، - دەدى ول.

اۆتور: ايان بەكەن ۇلى