تۇرمەگە اسكەر كىرگىزىلدى مە: ماڭعىستاۋداعى وقيعانىڭ ءمان-جايى
بۇعان دەيىن ماڭعىستاۋ وبلىستىق قىلمىستىق اتقارۋ جۇيەسى دەپارتامەنتىنە قاراستى گ م-172/6 مەكەمەسى ماڭىنا سوتتالۋشىلاردىڭ تۋىستارى جينالعان ەدى. وعان اتالعان مەكەمەگە اسكەر كىرگىزىلىپ، سوتتالۋشىلار سوققىعا جىعىلدى دەگەن قاڭقۋ ءسوز سەبەپ بولعان.
«قۇقىق قورعاۋ ۇيىمدارىنىڭ وكىلدەرى كولونيانى كارانتينگە بايلانىستى بارلىق سانيتارلىق-ەپيدەميولوگيالىق تالاپتاردى ساقتاي وتىرىپ ارالاپ شىقتى. تۇرمەنى ارالاۋ بارىسىندا سوتتالۋشىلاردان «مەكەمەگە اسكەر كىرگىزدى مە؟» دەپ سۇراپ، وعان «جوق» دەگەن جاۋاپ الدى. مۇنىڭ بارلىعى بەينەتاسپاعا ءتۇسىرىلىپ وتىردى. كەلۋشىلەر تۇرمە اسحاناسىن، دەمالىس كلۋبىن، جاتىن ورىنداردى ارالاپ كوردى. مەكەمەنى ارالاپ شىققاننان كەيىن قۇقىق قورعاۋشىلار تۋىستارى تۇرمە جانىندا جينالعان سوتتالۋشىلارمەن جەكە-جەكە اڭگىمەلەستى. ولاردان مەكەمە قىزمەتكەرلەرى نەمەسە سوتتالۋشىلار تاراپىنان «ۇرىپ-سوعۋ بولدى ما؟» دەگەن سۇراققا جاۋاپ الىندى.
سونىمەن قاتار بۇعان دەيىن تەلەارنادان ۆيدەوۇندەۋى كورسەتىلگەن سوتتالۋشى دا اڭگىمەگە تارتىلدى. قۇقىق قورعاۋشىلار وعان كىنالى تۇلعالار مىندەتتى تۇردە جازاعا تارتىلاتىنىن ايتتى. الايدا، جالعان ايىپتاۋ بولسا، وندا ءوزىنىڭ دە جاۋاپكەرشىلىككە تارتىلاتىنىن ەسكەرتە وتىرىپ، شاعىم جازۋدى ۇسىندى»، - دەلىنگەن اقپاراتتا.
ءبىراق سوتتالۋشى شاعىم جازۋدان باس تارتقان.
«مۇنان بولەك، قۇقىق قورعاۋشىلار اتالعان فاكتى بويىنشا سوتتالعان ازاماتتىڭ وتىنىشىمەن قىلمىستىق ءىس قوزعالعاندىعىن ءتۇسىندىردى. قازىرگى ۋاقىتتا اتالعان ماتەريالدى وبلىستىق پروكۋراتۋرا قاراپ جاتىر. قۇقىق قورعاۋشىلار تۇرمەنى ارالاپ شىققاننان كەيىن سوتتالۋشىلاردىڭ تۋىستارىمەن كەزدەسىپ، ولارعا مەكەمەنى ارالاۋ بارىسىندا تۇسىرىلگەن ۆيدەوماتەريالدى كورسەتتى»، - دەدى ق ر ءى ءى م- نەن.